"Vaqner” qrupunun yaradıcısı Yevgeni Priqojinin ölümü ilə nəticələnən təyyarə qəzasında Kremlin əli olması ilə bağlı iddialar tamamilə yalandır.

Sfera.az xəbər verir ki, bunu jurnalistlərə açıqlamasında Rusiya prezidentinin mətbuat katibi Dmitri Peskov qəza ilə bağlı Kremli ittiham edən Qərb dairələrinin bəyanatlarını şərh edərkən deyib.

“İndi Yevgeni Priqojin də daxil olmaqla, təyyarənin sərnişinlərinin faciəli ölümü ətrafında çoxlu fərziyyələr var. Yevgeni Priqojinin ölümünü təsdiqləmək üçün ekspertiza lazımdır, lakin hələlik heç bir rəsmi nəticə yoxdur",- Peskov qeyd edib.

Qeyd edək ki, 23 avqust tarixində Tver vilayətinin Kujenkino kəndi yaxınlığında Moskvadan Sankt-Peterburqa uçan şəxsi "Embraer Legacy" təyyarəsi qəzaya uğrayıb. İlkin məlumata görə, təyyarədə olan on nəfərin hamısı həlak olub. Federal Hava Nəqliyyatı Agentliyinin təqdim etdiyi sərnişinlərin siyahısına əsasən, sərnişinlər arasında Yevgeni Priqojin də var.

Rusiya İstintaq Komitəsi Tver vilayətində baş vermiş təyyarə qəzasından sonra yol hərəkəti təhlükəsizliyi və hava nəqliyyatının istismarı qaydalarının pozulması ilə bağlı iş açıb. İstintaq qrupu hadisə yerinə yola düşüb, bütün zəruri ekspertizalar təyin olunacaq, qəzanın səbəblərini müəyyən etmək üçün bir sıra əməliyyat-istintaq tədbirləri həyata keçiriləcək.

Əzizə