Xanımlarla dostluq edən kişilərin davranışlarında hansı dəyişikliklər olur? – Psixoloqdan AÇIQLAMA

Bəzi hallarda xanımlarla daha çox dostluq edən kişilərin davranışlarında müəyyən dəyişikliklərin yarandığı deyilir. Məsələn, bu şəxslərin danışıq tərzlərinin, zövqlərinin dəyişdiyi bildirilir.

Maraqlıdır, bu fikirlərin elmi əsası varmı?

Mövzu ilə bağlı Sfera.az-a açıqlama verən psixoloq Rövşən Nəcəfov xanımlarla dostluq edən bəylərin xarakter və davranışlarının dəyişməsinin bütün hallarda keçərli olmadığını deyib:

“Bəylərin xanımlarla dostluq etməsi normaldır. İnsan olduğu mühitə adaptasiya olur. Lakin bu o demək deyil ki, bu, onun bioloji və psixoloji baxışlarına təsir edəcək. Ümumiyyətlə, insanın bioloji və psixoloji cinsiyyəti fərqli ola bilər. Ən böyük uyğunsuzluq isə bu zaman yaranır. Belə olan halda peşəkarlara müraciət etmək lazımdır ki, bu uyğunsuzluğu tənzimləmək mümkün olsun. Bəzən biz bu uyğunsuzluğu gözardı edirik, amma bu, gələcəkdə şəxsin əmək və şəxsi həyatında uçurumlara səbəb olur. Bu məsələ insanın yaşı ilə də bağlıdır. Psixoloji  və bioloji yaş arasında fərqlilik olarsa, uyğunluq tənzimlənməlidir. Nə olursa olsun, düşüncəmizi dəyişmədən həyatımızı dəyişə bilmərik. Düşüncəni dəyişmək üçün isə obyektiv baxış lazımdır. Bunun üçün də psixoloqlara müraciət gərəkir".

Mütəxəssis insanın xarakterinin dəyişilməz olduğu ilə bağlı düşüncələrin yanlış olduğunu qeyd edib:

“İnsanın düşüncə və davranışlarını yaşadığı mühitlə, münasibətləri tənzimləyir. Bioloji faktor isə insanın psixikasına, psixoloji faktor isə fiziologiyaya təsir edir. Bu gün müşahidələrimiz əsasında şəxslərin davranışlarında uyğunsuzluq müəyyən edilirsə, həmin uyğunsuzluğun mütləq bir bioloji və ya psixoloji səbəbi var. İlkin müşahidə zamanı biz bunun konkret nə olduğunu bilmirik. Ola bilsin, həmin şəxslərin davranışları uşaqlıq travmalarına bağlıdır. Ola bilər ki, şəxsin böyüdüyü mühit, ailə onun davranışlarını başqa formada tənzimləyib. Bir şəxsin psixoportretini görmək üçün onun psixodioqnostik testlərdən keçməsi və dəfələrlə müşahidə edilərək müəyyən edilmiş psixoloji aspektlərin interpretasiyası çox önəmlidir. Yəni biz interpretasiya etmədiyimiz diaqnozu fakt olaraq ifadə edə bimərik”.

İnci