Türkiyə Prezidenti Rəcəb Tayyib Ərdoğanla rusiyalı həmkarı Vladimir Putinin görüş tarixi bəlli olub. Liderlər sentyabrın 4-də Soçi şəhərində bir araya gələcəklər.

Bununla bağlı Sfera.az-a açıqlama verən  Beynəlxalq Münasibətlər və Diplomatiya Araşdırmaları Mərkəzinin sədri Samir Hümbətov Ərdoğanın Rusiyaya gözlənilən səfərinin əslində süpriz olduğunu deyib:

“Putinin Türkiyəyə səfər etməsi gözlənilirdi. Bir anda onun fikrini dəyişməsi burada başqa proseslərin olduğunu göstərir. Hər halda görüşün mövzuları bəllidir: Taxıl sazişi, Ukrayna məsələsi, eyni zamanda Cənubi Qafqaz, xüsusilə Qarabağ, Ermənistan-Azərbaycan məsələsi. Həmçinin iki liderin müzakirə edəcəyi mövzular arasında Suriya, Liviya da yer alacaq. Məlum vəziyyət bunu tələb edir”.

Müsahibimiz müzakirə ediləcək mövzular sırasına Rusiya qazının Türkiyə üzərindən çatdırılması məsələsini də əlavə edib:

“Bu görüşdə hər şeyin rahat həll olunacağını düşünmürəm. Putin də zaman-zaman Ərdoğanla bəzi məsələlərdə çətin razılığa gələ bildiyini etiraf edib. Lakin ortaq yola gəlinən məsələlər də öz həllini tapıb. Nəticənin nə olacağı bəlli olmasa da, taxıl sazişinə qayıtmağın mümkün olduğunu demək olar. Çünki bu, Türkiyə üçün önəmli mövzulardan biridir. Bu problem Türkiyənin əli ilə həll olunacaqsa, artıq Afrika dövlətlərinin bu ölkəyə inamı daha da artacaq, bu da onun nüfuzunu qaldıracaq. Hesab edirəm ki, liderlərin görüşündə Cənubi Qafqaz məsələsi xüsusi müzakirə mövzusu olacaq. Burada Azərbaycan-Ermənistan münasibətlərinin tənzimlənməsi, sülh müqaviləsi ətrafında müzakirələrin aparılması gözləniləndir”.

Günay Rəsulqızı