Quru sərhədlər bağlı olduğuna görə istirahət üçün bölgələrə üz tutan vətəndaşlarımız kifayət qədərdir. Təəssüf ki, regionlardakı turizm obyektləri ilə bağlı şikayətlər də çoxalır. İnsanlar bölgələrdə təbii məhsullardan istifadə edə biləcəklərini düşünsələr də,  əksi ilə qarşılaşırlar. Necə deyərlər, bu sahədə də işbazlar iş başındadır.

Mövzu ilə bağlı Sfera.az-a açıqlama verən qida məsələləri üzrə ekspert Ağa Salamov deyib ki, regionlarda yerləşən ictimai-iaşə müəssisələrinin əksəriyyəti çox acınacaqlı vəziyyətdədir:

“Çünki onlar mütəxəssislərlə işləmir, hər şeyin ucuzuna qaçırlar. Belə olduqda isə keyfiyyət aşağı düşür. İlk növbədə qida məhsullarının keyfiyyətli olması, saxlanması daşınması və.s məsələlər nəzarətdə olmalıdır. Təəssüf ki, ictimai-iaşə müəssisələrinin çoxunda çalışanların, rəhbərliyin qida bilgisi yoxdur. Əksəriyyəti təlimlərdə iştirak etməyən adamlardır və ya heyəti təlimatlandıracaq qədər biliyə malik deyillər. Gərək rəhbərlik nəsə bilsin ki, tələb də etsin. Regionlara dincəlməyə üz tutursan, amma xidmətin sıfır səviyyəsində olduğunu görürsən. Restoranın tutumu tutaq ki, 100 nəfərdisə, masa sayına, insan tutumuna görə ofisiantlar olmalıdır. Hər işçinin də öz ərazisi olmalıdır, yəni 2 masaya baxan və ya 3 masaya baxan süfrəçilər var. Bunlar tənzimlənməlidir. Yeməklər ən azı 15 dəqiqəyə müştərinin önündə olmalıdır. Yoxsa insanlar restoranda əyləşir, saatlarla yemək gözləmək məcburiyyətində qalırlar. Həm işçi azlığı, həm də mövsümdən yararlanıb daha çox pul qazanmağa çalışmaq keyfiyyəti aşağı salır”.

Müsahibimiz bildirib ki, bölgələrdə restoranlara, ictimai-iaşə obyektlərinə nəzarət sistemi yoxdur:

“Bununla bağlı qanun, standart yoxdur, ona görə də bölgələrdə turizm bərbad vəziyyətdədir. Nəzərə almaq lazımdır ki, quru sərhədlər bağlı olduğuna görə insanlar ən azından həftəsonları regionlara üz tutmağa üstünlük verirlər. Bu baxımdan ən azı həftəsonları bölgələrdəki ictimai-iaşə müəssisələri əlavə ofisiantlar cəlb etməlidirlər. Onların qida bilgiləri olmalı - ətin, balığın, digər məhsulların saxlanma şəraitinə nəzarət edilməlidir, bişirmə, soyutma texnologiyalarına riayət olunmalıdır və.s. Təəssüf ki, Azərbaycanda bu bilgilərə sahib çox az otel və restoranlarımız var”.

Günay Rəsulqızı