“Suyun dibinin relyefi öyrənilmir...” – Dənizdə boğulanların sayı niyə artır?
“Çimərliyə gedən şəxslər təhlükəsizlik bağlı öncədən planlı olmalıdır”.
Bunu Sfera.az -a açıqlamasında təhlükəsizlik məsələləri üzrə ekspert Elmar Nurəliyev deyib. O qeyd edib ki, çimərliklərlə bağlı kifayət qədər maarifləndirilmə işləri aparılsa da, bu, vətəndaşlar tərəfindən ciddiyə alınmır:
“Bu, təkcə bizdə belə deyil. Hər il dünyada təxminən 400 minə yaxın insan çimərliklərdə boğularaq həyatlarını itirir. Bu isə kifayət qədər böyük rəqəmdir. ABŞ-də hər il 8 mindən çox insan bu faciə ilə üzləşir. Yəni əksər ölkələrdə vəziyyət eynidir və bu istiqamətdə maarifləndirmə tədbirləri davam etdirilir. Boğulanların statistikasının təhlili göstərir ki, boğulanlmaların 95 faizi məhz qeyri-çimərlik ərazilərində baş verir. Bu bir daha onu göstərir ki, qeyri-çimərlik ərazilərinə üz tutmaq olmaz”.
Müsahibimiz bildirib ki, bu yerlərdə xilasetmə xidməti də olmur:
“Həmin yerlər çimmək üçün nəzərdə tutulmur, suyun dibinin relyefi öyrənilmir. Digər tərəfdən, əlverişsiz hava şəraitində çimərliyə gedənlər də olur. Bu da çox ciddi məsələdir. Günün qaranlıq saatlarında, küləyin normadan yüksək olduğu vaxtlarda çimərliyə getmək olmaz. Bunlar sonda bədbəxt hadisələri qaçılmaz edir. “Mən üzə bilirəm, boğulmaram” kimi fikirlər də doğru yanaşma deyil. Üzə bilən də boğulma, batma təhlükəsi ilə üz-üzə qala bilər. Çimərliyi yarış meydançasına çevirməmək lazımdır”.
Günay Rəsulqızı
