Birləşmiş Millətlər Təşkilatının (BMT) Ərzaq və Kənd Təsərrüfatı Təşkilatı (FAO) Qlobal Ərzaq Qiymətləri İndeksini açıqlayıb.

Sfera.az xəbər verir ki, yeni açıqlanan məlumata əsasən, iyulda əvvəlki ayla müqayisədə ərzaq mallarının qiymət səviyyəsi 1,3 faiz artıb. Amma ötən ilin iyul ayı ilə müqayisədə qiymət səviyyəsi 11,8 faiz azalıb.

İyulda aylıq müqayisədə ərzaq qiymətlərinin yüksəlməsi Qara Dəniz Taxıl Təşəbbüsünün sona çatması ilə əlaqədardır. Təşəbbüsün dayandırılması taxıl, bitki yağları kimi mühüm məhsulları bahalaşdırıb.

İyulda taxıl qiymətləri 1 faizə yaxın yüksəlib. Artımın lokomotivi rolunu buğdanın qiyməti oynayıb. Buğdanın dəyəri 1,5 faizdən çox artıb.

Aylıq müqayisədə taxıl qiymətləri yüksəlsə də keçən ilin eyni dövrü ilə müqayisədə qiymətlərdə 14,5 azalma qeydə alınıb.

Taxıl məhsulları ilə yanaşı iyulda bitki yağlarının qiymət səviyyəsi 12,1% artıb.

Ötən ay günəbaxan, palma, soya və kolza yağlarının dəyəri yüksəlib.

Rusiyanın Qara Dəniz Taxıl Təşəbbüsünü dayandırmaq qərarından sonra regiondan ixrac edilə bilən tədarüklə bağlı qeyri-müəyyənliklər səbəbindən günəbaxan yağının qiymətləri aylıq 15 faizdən çox artıb.

Vasif