Azərbaycanın əsas ticarət tərəfdaşlarından olan Rusiyanın milli valyutası uzuclaşmaqda davam edir.

Sfera.az xəbər verir ki, bu gün bir dollar 95 rubl səviyyəsinə yüksəlib.

Rus rublunun məzənnəsində ucuzlaşma son bir həftədə güclənib. İyulun 27-də 89,8 rubl olan bir ABŞ dolları hazırda 95 rubla dəyişdirilir. Qısa müddətdə Rusiyada dollar 6 faizə yaxın bahalaşıb.

Son zamanlar müşahidə olunan rublun məzənnəsinin zəifləməsinin bir neçə əsas səbəbi var. Onlardan biri 2023-cü ildə ticarət balansında müsbət fərqin nəzərəçarpacaq dərəcədə azalmasıdır.

Bütün dünyada Rusiyanın əsas ixrac əmtəələrinin (karbohidrogenlər, metallar, ərzaq məhsulları) qiymətlərində azalma tendensiyası müşahidə olunur. Nəticə etibarı ilə ölkənin ixrac gəlirlərində müəyyən azalma baş verir.

İxrac azaldığı halda idxalda əhəmiyyətli artım baş verib. Bundan başqa, turizm dövrü ilə əlaqədar olaraq xaricə səfərlər artıb və bununla əlaqədar valyuta çıxışı da artıb.

Rusiyalı iqtisadçılar hesab edir ki, mövsümi amillərin təsiri payıza qədər aradan qalxacaq ki, bu da rublun məzənnəsinin müəyyən qədər sabitləşməsinə səbəb ola bilər. Digər tərəfdən ekspertlər rublun ucuzlaşmasından sonra idxaldakı artımın da dayanacağını, hətta idxalın bir qədər azalacağını gözləyirlər.

Rusiyalı ekspertlər Rusiyanın çətin dövründə rublun daha zəif məzənnəsinin üstünlük yaratdığını da bildirirlər. Onların şərhinə görə ucuz rubl büdcəyə əlavə gəlirlər əldə etməyə imkan verir ki, bu da digər şeylərlə yanaşı, sosial sahənin - pensiyaların, müavinətlərin və s. maliyyələşdirilməsini asanlaşdırır.

Rusiyanın ən böyük problemlərindən biri də ölkədən müxtəlif sxemlər vasitəsilə ölkədən valyuta çıxışının baş verməsidir. Rusiya hökuməti bütün cəhdlərə baxmayaraq valyuta çıxışlarının qarşısını ala bilmir. Bu vəziyyət rublun bir qədər də ucuzlaşmasına səbəb olur. 

Rublun ucuzlaşması Azərbaycanda da müşahidə edilir. Hazırda 1000 rubl 18 manatdır.

Vasif