“Qərb ölkələri Ermənistanı “çirkli üsullarla” şantaj edir, bu ölkənin Rusiya ilə tərəfdaşlığına qarşı çıxılır, istənilən üsullara əl atılır”.

Sfera.az TASS-a istinadən xəbər verir ki, bu barədə Rusiya Xarici İşlər Nazirliyinin MDB ölkələri üzrə dördüncü departamentinin direktoru Denis Qonçar bildirib.

Diplomatın qeyd etdiyi kimi, bu gün Moskva ilə İrəvan arasında KTMT, Aİİ və MDB çərçivəsində, eləcə də müxtəlif beynəlxalq platformalarda “sıx siyasi əlaqələr sistemi” qurulub.

“İrəvanla münasibətlərin bəzi mənfi cəhətlərindən danışsaq, bu, ilk növbədə Qərb dövlətlərinin Rusiya-Ermənistan tərəfdaşlığına xələl gətirmək cəhdləri ilə bağlıdır. İstənilən üsuldan, o cümlədən tamamilə çirkin üsullardan istifadə olunur - sanksiyalarla şantaj, ədalətsiz rəqabət", - Qonçar vurğulayıb.

Onun sözlərinə görə, hər kəs “dünyanın müxtəlif yerlərində, o cümlədən postsovet məkanında “Qərb “dostluğunun” necə nəticələndiyini bir çox nümunələrlə görə bilər.

“Biz erməni dostlarımızın müdrikliyini gözləyirik. Biz öz tərəfimizdən, əvvəlki kimi, bütün problemli məsələləri müttəfiq şəkildə, birbaşa və səmimi dialoq çərçivəsində həll etmək əzmindəyik”, - deyə diplomat fikrini yekunlaşdırıb.

Əzizə