Erməni lobbisi ABŞ-da “Atatürk” serialının nümayişini ləğv etdirib – Türkiyədən etiraz

Erməni lobbisinin məqsədi Türkiyə-Ermənistan münasibətlərinin nizamlanmasının qarşısını almaqdır.

Sfera.az xəbər verir ki, bu barədə hakim “Ədalət və İnkişaf” partiyasının nümayəndəsi Ömər Çelik özünün Tvitter səhifəsində yazıb.

Onun sözlərinə görə, "Disney" platforması erməni lobbisinin təzyiqinə boyun əyərək Atatürklə bağlı serialın nümayişini ləğv edib.

“Bu platformada belə davranış Türkiyə Cümhuriyyətinin və xalqımızın dəyərlərinə hörmətsizlikdir. Dəfələrlə qeyd etdiyimiz kimi, ABŞ-də qondarma “soyqırım” iddialarını təbliğ edən bu şəbəkə tarixi hadisələrdən öz saxtakarlıq siyasəti üçün alət kimi istifadə edir. Bu lobbinin yeganə məqsədi dəfələrlə müşahidə olunduğu kimi, Türkiyə-Ermənistan münasibətlərinin nizamlanmasının qarşısını almaqdır”,-deyə o yazıb.

Xatırladaq ki, daha əvvəl "Disney Plus" müasir Türkiyə dövlətinin qurucusu Mustafa Kamalın həyatından bəhs edən "Atatürk" serialını yayımlamaqdan imtina etmək qərarına gəlib.

“Türkiyənin 100 illiyi”ndən bəhs edən serial noyabrın 3-dən bədii filmə çevriləcək və eksklüziv olaraq Türkiyə kinoteatrlarında nümayiş olunacaq. Film "Disney"ə 8 milyon dollara başa gəlib.

Xüsusilə ABŞ Erməni Milli Komitəsi (ANCA) müasir Türkiyənin qurucusunun həyatından bəhs edən teleserialın nümayişinə qarşı olduğunu bildirib, "Disney"dən filmin yayımını ləğv etməyi tələb edib.

Əzizə