“İrəvandan cavab gözləyirik” – KTMT sərhədə yerləşmək niyyətini bir daha AÇIQLADI

“KTMT  Azərbaycan və Ermənistan sərhədində müşahidə missiyasının yerləşdirilməsi məsələsinin müzakirəsinə qayıtmağa hazırdır, təşkilat İrəvanın cavabını gözləyir”.

Sfera.az xəbər verir ki, bunu  Rusiya Xarici İşlər Nazirliyinin MDB ölkələri üzrə birinci departamentinin direktoru Mikael Ağasandyan RİA Novosti-yə müsahibəsində bildirib.

“KTMT-ni yaradan dövlətlər heç vaxt regionda vəziyyətin sabitləşməsinə kömək etmək səylərindən çəkinməyiblər və erməni dostlarımıza təşkilatın geniş imkanlarından maksimum fayda ilə istifadə etməyə imkan verəcək konkret həll yolları təklif etməyə hazır olduqlarını dəfələrlə təsdiqləyiblər. Biz hələ də İrəvandan müsbət cavab gözləyirik və Ermənistanın sərhədyanı rayonlarında KTMT-nin monitorinq missiyasının yerləşdirilməsini icra etməyə, eləcə də müttəfiqimizə kömək üçün digər birgə tədbirlərlə bağlı əsaslı işi bərpa etməyə hazırıq”, - rəsmi deyib.

Ağasandyan eyni zamanda qeyd edib ki, Qərb dövlətləri “Rusiya Federasiyasına və onun Cənubi Qafqazdakı mövqelərinə maksimum ziyan vurmaq” üçün Rusiyanın ən yaxın müttəfiqlərinə, o cümlədən Ermənistana siyasi və iqtisadi təzyiqlər göstərməyə çalışırlar.

"Bu tapşırığa nail olmaq üçün onlar regional təhlükəsizliyin mövcud mexanizmlərini, o cümlədən KTMT-nin imkanlarına əsaslanan mexanizmləri pozmağa çalışırlar. Ümid edirik ki, İrəvanda bunu yaxşı başa düşürlər", - diplomat vurğulayıb.

O, qeyd edib ki, KTMT hər hansı digər beynəlxalq təşkilat kimi hər hansı problemi həll edən “sehrli çubuq deyil”.

"Dağlıq Qarabağ münaqişəsi ən mürəkkəb münaqişələrdən biridir, onun dərin tarixi kökləri var. Davamlı nizamlanmanın yeganə yolu Ermənistan-Azərbaycan münasibətlərinin danışıqlar, tərəflərin qarşılıqlı hörməti, onların istəyi əsasında ardıcıl normallaşmasından keçir. Bu kontekstdə mən Rusiyanın və şəxsən prezident Vladimir Putinin bu çətin prosesdə oynadığı əsas vasitəçi rolunu qeyd etməyə bilmərəm”, - Ağasandyan bildirib.

Əzizə