44 günlük Vətən müharibəsində torpaqlarımızın bütövlüyü uğrunda gedən döyüşlərdə qəhrəmancasına şəhid olan Elvin Nizami oğlu Mikayılovun ad günü Alpout kəndində şəhidin məzarı önündə qeyd olunub.

Sfera.az xəbər verir ki, mərasimdə rayon İcra Hakimiyyətinin başçısı aparatının Vətən müharibəsi iştirakçıları və şəhid ailələri ilə işin təşkili şöbəsinin əməkdaşları, RİH başçısının Alpout kənd inzibati ərazi dairəsi üzrə nümayəndəsi, kənd bələdiyyəsi, Göyçay Sukanal Sahəsinin rəisi, şəhid ailələrinin üzvləri, vətən müharibəsi əlilləri və iştirakçıları, ictimaiyyət nümayəndələri iştirak ediblər. 

Əvvəlcə şəhidin əziz xatirəsi ehtiramla yad olunub, məzarı üzərinə gül dəstələri düzülüb. 

Mərasimdə çıxış edənlər şəhid Elvin Mikayılovun qısa və mənalı həyat yolundan söz açaraq, vətənimizin bütövlüyü uğrunda mübarizədə canlarından keçmiş şəhidlərin əziz xatirəsini daim uca tutmağı, tarix yazan qəhrəman şəhidlərin and yerimizə, ziyarət məkanımıza çevriləcəklərini bildiriblər.

Şəhidin ailə üzvləri göstərilən diqqət və qayğıya görə Prezident cənab İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.

Xatırladaq ki, şəhid Elvin Mikayılov 01.08.1986-ci il tarixdə Göyçay rayonu Alpout kəndində anadan olub. 21 sentyabr 2020-ci il tarixdə hərbi təlimlərə cəlb edilib. 26 oktyabr 2020-ci il tarixdə Talış-Suqovuşan istiqamətində gedən döyüşlərdə qəhramancasına şəhid olub.

Ölümündən sonra Azərbaycan Respublikası Prezidentinin sərəncamı ilə “Vətən uğrunda”və “Laçının azad olunmasına görə” medalları ilə təltif edilib.