İranın XİN rəhbəri Quranın yandırıldığı ölkələrə sanksiya qoyulmasını təklif etdi

Quranın təhqir edilməsi beynəlxalq səviyyədə cinayət məsuliyyətini yaratmalı, belə hərəkətlər təkrarlanarsa, diplomatik münasibətlər minimum səvəyyəyyə salınmalı və ya kəsilməli, həmin ölkədən malların alınmasına embarqo qoyulmalıdır.

Sfera.az xəbər verir ki, bu barədə İranın xarici işlər naziri Hüseyn Əmir Abdullahiyan İslam Əməkdaşlıq Təşkilatının onlayn iclasından sonra öz Tvitter səhifəsində yazıb.

“Mən bu əməllərin beynəlxalq səviyyədə kriminallaşdırılmasını, bu iki ölkəyə İƏT nümayəndə heyətinin göndərilməsini, günahkarların ciddi şəkildə cəzalandırılmasını və təkrarlanarsa, əlaqələrin səviyyəsinin aşağı salınmasını və ya kəsilməsini və malların alınmasına embarqo qoyulmasını təklif etdim”, - deyə bəyanatda bildirilir.

Qeyd edək ki, ötən gün İsveç və Danimarkada Quranın yandırılması ilə əlaqədar təkrar aksiyalarla bağlı İƏT-in xarici işlər nazirləri səviyyəsində fövqəladə iclası keçirilib. Görüşün yekunları üzrə dərc olunan bəyanatda deyilir ki, Danimarka və İsveçin bu cür hərəkətlərin təkrarlanmaması üçün tədbirlər görməməsi BMT Təhlükəsizlik Şurasının iyunun ortalarında qəbul etdiyi qətnamənin pozulmasıdır.

Bundan əlavə, təşkilat üzv ölkələri Quranın təhqir edilməsi və yandırılması hallarının baş verdiyi ölkələrlə münasibətlərdə siyasi, iqtisadi, mədəni və digər səviyyələrdə müvafiq tədbirlərin görülməsi imkanlarını nəzərdən keçirməyə çağırıb.

Əzizə