“Azərbaycana gələn turistlərin böyük əksəriyyəti yalnız Bakıda qalmağa üstünlük verirlər”.

Sfera.az bildirir ki, bunu deputat Vüqar Bayramov deyib. Millət vəkili digər bölgələrlə bağlı statistik məlumatlardan da söz açıb:

“Bu ilin birinci yarısında turistlərin 84,2 faizi Bakıda, 4,0 faizi Qusarda, 3,6 faizi Naftalanda, 3,4 faizi Qəbələdə, 2,0 faizi Qubada, 0,4 faizi Gəncədə, 2,4 faizi isə digər şəhər və rayonlardakı hotellərdə gecələyiblər. Bütövlükdə isə ölkə üzrə hotellərdə gecələmələrin ümumi sayı 32,7 faiz artaraq 1363,2 minə çatıb. Turistlər üzrə isə gecələmələrin sayı 56,5 faiz artaraq 788,1 min olub. Bölgələrimiz xarici tursit cəlb etməkdə paytaxt hotellərinə yenə də uduzurlar”.

Deputat qeyd edib ki, hələ də bölgələr turizm potensialını tam təqdim edə bilmir və ya xarici turist cəlbində çətinlik yaşayır:

“Əksər rayonlarda turizm xidmətlərinin qiyməti yüksəkdir, keyfiyyət isə hələ də standartlardan geri qalır. Nəticədə, bölgələrimizin böyük turizm potensialından tam istifadə olunmur. Bu isə o deməkdir ki, bölgələrin turizm imkanlarının reinteqrasiyası üçün işlər sürətləndirilməlidir. Bölgələrdə turizm sektoruna daha çox sərmayənin cəlb edilməsi və rəqabətin gücləndirilməsi əsas hədəflərdən olmalıdır”.

Günay Rəsulqızı