Adana vilayətində baş verən zəlzələ nəticəsində ən azı 8 nəfər xəsarət alıb.

Sfera.az xəbər verir ki, bunuTürkiyənin səhiyyə naziri Fahrettin Koca bildirib.

"Kozanda baş verən zəlzələdən sonra Adanada 2, Osmaniyedə isə 6 nəfər hündürlükdən yıxılaraq üzərinə əşyaların düşməsi nəticəsində xəsarət alıb. Yaralılar xəstəxanaya yerləşdirilib", - nazir Tvitter hesabında yazıb.

AFAD-ın risklərin azaldılması şöbəsinin müdiri Orxan Tatar bildirib ki, Adanada baş verən yeraltı təkanlar fevralın 6-da baş verən zəlzələlərdən sonra baş verən təkanlar sayıla bilər.  Qeyd edək ki, Adana vilayətinin Kozan şəhərindən 20 kilometr şimalda 5,5 bal gücündə zəlzələ baş verib. Ocaq 10 kilometr dərinlikdə yerləşib.

Xatırladaq ki, fevralın 6-da Türkiyənin cənub-şərqindəki Kahramanmaraş vilayətində 9 saatlıq fasilə ilə 7,7 və 7,6 bal gücündə güclü zəlzələlər baş verib. Yeraltı təkanlar Suriya da daxil olmaqla ölkənin 11 əyalətində və qonşu dövlətlərdə hiss olunub. Türkiyə hakimiyyəti zəlzələni "əsrin fəlakəti" adlandırıb. Fevralın 6-da Türkiyənin cənub-şərqində baş verən zəlzələ nəticəsində ölənlərin sayı 50,5 min nəfərə çatıb.

Əzizə Zeynal