Taksi qiymətlərinin bahalaşması nə vəd edir? - Ekspert
Azərbaycanda taksi fəaliyyəti ilə məşğul olan özəl şirkətlərin xidmət haqqını artırması birmənalı qarşılanmayıb. Əvvəllər taksilərdə minimum ödəniş tarifi 1 manatdan başlayırdısa, indi bu, 2.5 manat dəyərində müəyyənləşib. Qərar isə əksəriyyətin narazılığına səbəb olub.
Maraqlıdır, sözügedən qərarın nəticələri necə olacaq? Taksilərə təlabat azalacaqmı?
Mövzy ilə bağlı Sfera.az-a açıqlama verən nəqliyyat məsələləri üzrə ekspert Eldəniz Cəfər deyib ki, bir neçə şirkətin sövdələşərək eyni vaxtda qiymətləri kəskin yüksəltməsi müəyyən iqtisadi risklər yaradır:
“Taksi qiymətlərinin yüksəlməsi ilə digər sferalarda da qiymət artımı müşahidə oluna bilər. Bundan əlavə, qiymətlərinin artırılması vətəndaşların ictimai nəqliyyata əlçatanlığını azalda bilər. Taksi bu gün ictimai nəqliyyatın bir qoludur, artıq bütün dünyada taksilər premium daşınma xidməti deyil. Bu gün Azərbaycanda ictimai nəqliyyatın avtobus seqmentinin bərbad olmasına görə insanlar daha çox taksiyə üz tuturlar. Əgər taksilərin qiymətləri belə kəskin yüksəlirsə və vətəndaşlar bir nöqtədən digər nöqtəyə səfər etməkdə çətinlik çəkəcəklərsə, yollarda qalacaqlarsa, vaxtlı-vaxtında işə gedə bilməyəcəklərsə, bu, əlbəttə, Bakının həm paytaxt, həm də iri sənaye şəhəri kimi iqtisadiyyatına böyük zərər vurur. Bakı da Azərbaycan iqtisadiyyatının bir hissəsini təşkil edir, buna görə də ümumilikdə iqtisadiyyatımıza böyük zərər dəyə bilər”.
Müsahibimiz qeyd edib ki, payıza qədər müvafiq dövlət qurumlarının qiymətlərin tənzimlənməsi ilə məşğul olması arzuolunandır:
“Digər tərəfdən, taksi şirkətləri yenə də Azərbaycan qanunlarına zidd, saymazyana hərəkət edirlər. Son aylar ərzində dövlətin əsas məqsədi taksidə keyfiyyətin yüksəldilməsi və daha təhlükəsiz daşınmaların həyata keçirilməsi idi. Amma bunun əksinə olaraq, taksi şirkətləri qiymətləri kəskin artırıblar. Belə olan halda əlbəttə, taksilərə olan tələb də azalacaq”.
Günay Rəsulqızı
