Ukrayna prezidenti Volodimir Zelenski müharibənin necə bitəcəyi ilə bağlı sualı cavablandırıb.

Sfera.az bildirir ki, o, NATO sammitindən qabaq “BBC”yə açıqlamasında döyüş meydanında qələbənin zəruri olduğunu bildirib.

“Dondurulmuş münaqişə ilə razılaşmayacağıq. Çünki bu, müharibədir və Ukrayna üçün perspektivsiz inkişafdır”.

Ukrayna lideri Putinin 2014-cü ildən bəri ölkəsi üçün təhlükəli olduğunu deyib: “O, nüvə silahından istifadə haqqında danışacaq. Amma düşünmürəm ki, bunu etməyə hazırdır, çünki Putin yaşamağı sevir və həyatı üçün qorxur. Lakin 21-ci əsrdə qonşusuna qarşı genişmiqyaslı müharibəyə başlayan, xüsusən reallıqla heç bir əlaqəsi olmayan bir insan haqqında dəqiq nəsə deyə bilmərəm”.

Ukrayna prezidenti həmçinin, Putinin “Zelenski yəhudilərin üz qarasıdır” fikrinə də münasibət bildirib. “BBC”nin məlumatına görə, Holokostda bir çox qohumunu, o cümlədən babasını itirən ölkə başçısı suala necə cavab verəcəyinə tam əmin olmadığını söyləyib. Ardınca o, bu fikirləri deyib:

“Putin sanki nə danışdığını tam dərk etmir. Üzr istəyirəm, amma elə bil o, Hitlerdən sonra antisemitizmin ikinci kralıdır. Bu, prezidentin danışığıdır? Sivil dünya belə danışa bilməz. Amma dünyanın reaksiyasını eşitmək mənim üçün vacib idi və dəstəyə görə minnətdaram”.

Qeyd edək ki, bu gün Litvanın paytaxtı Vilnüsdə NATO-nun növbəti sammiti başlayıb. Toplantı 2 gün davam edəcək və sabah, iyulun 12- də yekunlaşacaq.

Günay Rəsulqızı