“Ukrayna yalnız bu halda NATO-ya üzv ola bilər” – Zirvə sammitindən GÖZLƏNTİLƏR
İyulun 11-12-də NATO-nun Vilnüsdə Zirvə sammiti keçiriləcək. İclasın əsas mövzusu Ukrayna-NATO münasibətlərinin gələcəyi olacaq.
Mövzu ilə bağlı Sfera.az-a açıqlama verən siyasi şərhçi Aqşin Kərimov deyib ki, Ukraynanın NATO-ya üzvlüyü ilə bağlı Alyans daxilində fikir haçalanması mövcuddur:
“Əsas söz sahibi olan ABŞ hesab edir ki, Ukrayna müəyyən mərhələləri keçdikdən, bütün meyarlara cavab verdikdən sonra NATO ailəsinin “övladı” ola bilər. ABŞ-nin narahatlıqlarına şərik çıxan NATO üzvlərinin haqlı olduğu məqamlar var. Ukraynada yüksəkintensivli müharibənin davam etdiyi, Rusiyanın nüvə şantajına keçdiyi bir vaxtda Kiyevin Alyansa qəbul olunması böyük risklər yaradar. Buna görə də NATO-nun Vilnüsdəki Zirvə görüşündə uzağı Ukraynanın müdafiə qabiliyyətini gücləndirmək üçün alətləri çoxaltmaq barədə qərar verilə bilər”.
Ekspert sözügedən qərara nələrin daxil ola biləcəyindən də söz açıb:
“Buna Ukraynanın texnika ilə, sursatla, kəşfiyyat məlumatları ilə əhatəli təminatı; döyüş planlaşdırılması, təlimlər barədə yeni kodlaşdırmalar daxil ola bilər. Vilnüs sammitində Ukraynanın NATO-ya üzv olması ilə bağlı yekdil qərarın çıxarılacağını düşünmək sadəlövhlük olardı. Bu baxımdan Ukrayna hələ Rusiya ilə NATO arasındakı boz zonada qalmaqda davam edəcək. O, yalnız müharibədə qələbə qazandıqdan sonra Alyans üzvlüyünə baxa bilər. Lakin sammitdə Ukrayna ordusuna planlaşdırma üçün dərin və incə şəkildə tərtib edilmiş hərbi əməliyyatlar xəritəsini təqdim etmək barədə mühüm qərarlar çıxarıla bilər”.
Günay Rəsulqızı