COVID-19 tədbirləri olmadan keçiriləcək ilk Həcc ziyarəti dünən başlayıb.

Sfera.az xəbər verir ki, bu il təxminən 2,6 milyon müsəlmanın zəvvar olacağı gözlənilir. Səudiyyə Ərəbistanında 40 dərəcəni keçən temperatur isə zəvvarlığa namizədləri bir qədər çətin duruma salacaq.

Həcc öhdəliyini yerinə yetirmək üçün Səudiyyə Ərəbistanında olan təxminən 2,6 milyon zəvvarın Ərəfata səfəri dünən başlayıb. Qlobal istiləşmə səbəbindən orta temperaturun 2 dərəcə artdığı Səudiyyə Ərəbistanında havanın temperaturu 40 dərəcənin üzərindədir.

Səudiyyə rəsmiləri 32 000-dən çox tibb işçisinin və minlərlə təcili yardım maşınının istilik vurması, susuzluq və yorğunluq hallarını müalicə etməyə hazır olduğunu açıqlayıb. 2020-ci ildə koronavirusun yayılmasından sonra Səudiyyə Ərəbistanı bu il zəvvar namizədlərinə yaş və say məhdudiyyəti tətbiq etməyib. 2019-cu ildə 2,5 milyona çatan zəvvarın sayı pandemiya səbəbindən 2020-ci ildə 10 minə, 2021-ci ildə isə 60 minə endirilib. 2022-ci ildə pandemiyadan sonra ilk dəfə olaraq əcnəbilərin Həcc ziyarətinə icazə verilib, lakin şərt olaraq ziyarətə gedənlərin 18-65 yaş arasında olması və tam peyvənd edilməsi tələb olunurdu. Həmin il Səudiyyə Ərəbistanından kənarda olan təxminən 900 000 insan Həcc ziyarətinə gedib.

Qeyd edək ki, bu il Həcc ziyarəti iyunun 30-dək davam edəcək.

Əzizə