“Putinin ətrafında Priqojinə dəstək verənlər var” - Politoloq
“Putinin ətrafında Priqojinə dəstək verənlər var”.
Bunu Sfera.az-a açıqlamasında politoloq Məhəmməd Əsədullazadə deyib. O, qeyd edib ki, Ukraynanın uğurlu əks-hücumları fonunda Rusiya siyasi-hərbi müəssisələri arasında dərin böhranın olacağı gözlənilirdi:
“Rusiya ordusunun acınacaqlı bir vəziyyətdə olması Priqojinin siyasi tələblərini gündəmə gətirdi. Onun hərbi qiyam və çevriliş üçün hərəkətə keçməsi Rusiya siyasi sistemində yaranan boşluqdan irəli gəlir. Görünür, Putinin ətrafında ona dəstək verən qüvvələr var. Bütün hallarda “Vaqner”in hərbi qiyamı Ukrayna müharibəsində Rusiyanın məğlubiyyətinin göstəricisidir”.
Ekspertin sözlərinə görə, hərbi çevrilişin qarşısı alınmasa, Ukraynada Rusiya qoşunlarının məğlub olması qaçılmaz olacaq:
“Baş verənlər Rusiya vətəndaş müharibəsinə, nəticədə isə Putinin hakimiyyətdən getməsinə gətirib çıxara bilər. Demək olar ki, Priqojinin əsas planı Kremli ələ keçirməkdir. Baxmut ətrafında baş verən döyüşlər fonunda Priqojinlə Rusiya Müdafiə Nazirliyi arasında böhran siyasi müstəviyə keçdi. Sergey Şoyqunun “Vaqner”ə qarşı artilleriya və aviasiya ilə hücum etməsində məqsəd məhz Priqojinin hərəkətə keçməsinin qarşısını almaq olub. Görünür, Kremldə “Vaqner”in hərbi çevriliş planlarından xəbərdar olublar”.
Günay Rəsulqızı