“Toyota” 594 min avtomobilini zavod qüsuru səbəbindən geri çağırır. Bəzi avtomobillərdə amortizatorlarda problemlər aşkarlanıb.
 

Sfera.az bildirir ki, “Toyota Motor” Yaponiya Nəqliyyat Nazirliyinə bəzi avtomobillərin geri çağırılması barədə bildiriş təqdim edib. Geri çağırılma 2019-cu ilin dekabrından 2023-cü ilin mayına qədər istehsal olunmuş Yaris, Aqua və Sienta modellərinə aiddir.
 

Yaponiya Nəqliyyat Nazirliyi bu avtomobillərin aşağı amortizator qollarının qismən nasaz olduğunu bildirib. Kobud yollarda sürmək bu hissələrin qırılmasına səbəb ola bilər ki, nəticədə də dayanıqlıq azalır.


İndiyə qədər bu qüsurun qəzaya səbəb olması barədə məlumat verilməyib. Buna baxmayaraq, artıq bu problemlə bağlı 31 nasazlıq qeydə alınıb. Dörd halda isə avtomobil idarə etmək çətinləşib.
 

“Ford” isə yanğın təhlükəsi səbəbindən 125 mindən çox avtomobili geri çağırır.

Toyota bu avtomobillərin dilerlərdə sınaqdan keçiriləcəyini vurğulayıb. Bütün təmir işləri istehsalçının hesabına həyata keçiriləcək.

Aysel

Sfera.az