Ermənistanda “Mənim şərəfim var” fraksiyasının rəhbəri Hayk Mamicanyan xalqı Baş nazir Nikol Paşinyanı devirməyə çağırıb. O, müxalifətin “küçə döyüşləri"nə hazırlaşdığını bildirib.

Bununla bağlı Sfera.az-a danışan siyasi şərhçi Kənan Novruzov deyib ki, Paşinyanın Azərbaycanla ehtimal edilən sülh müqaviləsi, o cümlədən nəqliyyat-kommunikasiya xətlərinin açılamasına dair səsləndirdiyi loyal bəyanatlar ölkə daxilində mövcud iqtidar əleyhinə narazılığı artırır: 

“Mamicyanın bəyanatı Paşinyanın parlamentin 44 günlük müharibənin araşdırılması üzrə komissiyasının iclasında çıxışından sonraya təsadüf etdi. Bu, heç də təsadüf deyil. Baş nazirin xüsusilə Şuşanın Azərbaycana aid olması ilə bağlı səsləndirdiyi fikirlər, həmçinin onun keçmiş hakimiyyəti tənqid etməsi daxildəki müxalifləri qıcıqlandırmaya bilməzdi. Müxalifət başa düşür ki, belə davam etsə,  Paşinyanı “dayandırmaq mümkün olmayacaq”. Onun haqqında tez- tez "satqın" ifadəsinin işlədilməsi də məhz bu kontekstdən qiymətləndirməlidir. Sülh müqaviləsi ehtimalı yaxınlaşdıqca daxildəki müxalif kəsimin fəallaşması gözləniləndir. Onlar sülh müqaviləsi imzalanmadan Paşinyanla "haqq- hesabı çürütmək" istəyirlər”.

Ekspert bildirib ki, Paşinyanın hakimiyyətdən getməsi hazırda nə bizə, nə regiondakı digər "oyunçulara" sərf edir:

“Gələcəkdə Ermənistan hakimiyyətinə qarşı etirazların güclənməsi, o cümlədən aksiyaların başlanması mümkündür. Amma bunun Paşinyanın devrilməsi ilə nəticələnəcəyini düşünmürəm. Nəzərə almaq lazımdır ki, əvvəllər də Ermənistanda oxşar hadisələr olub, amma onlar nəticəsiz qalıb. Onu da unutmamalıyıq ki, Paşinyan məğlub olduğu halda yenidən baş nazir seçilən nadir siyasətçilərdəndir. Bu isə o deməkdir ki, mövcud iqtisadi siyasəti dəstəkləyən xarici qüvvələr var. Fikrimcə, bütün təzyiqlərə baxmayaraq, Paşinyan regiondakı əsas düyünlər açılana kimi hakimiyyətdə qalmağı bacaracaq”.

Günay Rəsulqızı