“Gələn həftə Vaşinqtonda sülh müqaviləsinin mətni hazırlanacaq” – Rusiya sərt reaksiya verəcək?
Xəbər verdiyimiz kimi, Ermənistanın baş naziri Nikol Paşinyan gələn həftə Ermənistan və Azərbaycan Xarici İşlər nazirləri arasında danışıqların Vaşinqtonda baş tutacağını açıqlayıb.
Bununla bağlı Sfera.az-a açıqlama verən politoloq Məhəmməd Əsədullazadə deyib ki, Vaşinqton iki ölkə arasında sülhün əldə edilməsi istiqamətində praktiki addımlar atır:
“Həmçinin, kommunikasiyaların və sərhədlərin delimitasiya-demarkasiyası üzrə İşçi Qrupun iclası da keçiriləcək. Bununla bağlı razılıq əldə edilib. ABŞ-də aparılan danışıqlar prosesində müsbət nəticənin olacağı istisna deyil. Çünki hər iki ölkə bir sıra məsələlərdə razılığa gəlib. ABŞ may ayından sülhün əldə edilməsi üçün real imkanlar yaradıb. Vaşinqtonda nazirlərin görüşü isə bir neçə gün çəkə bilər. Ola bilər ki, sülh müqaviləsinin mətni hazırlansın”.
Ekspert qeyd edib ki, bu istiqamətdə müəyyən irəliləyişlər olsa da, Ermənistan Qarabağ erməniləri ilə bağlı iddialardan da tam əl çəkmir:
“Həmçinin anklavlarla bağlı məsələlərdə İrəvan öz mövqeyinə düzəliş etməyib. Digər tərəfdən, Vaşinqton görüşündə müsbət nəticə olacaqsa, Rusiya yenidən fəallaşacaq. Düşünürəm ki, Qarabağda və şərti sərhəddə təxribatlara əl atılacaq”.
Günay Rəsulqızı