“Ukrayna Silahlı Qüvvələri əks-hücum əməliyyatlarını müvəqqəti olaraq dayandıra bilər”.

Bu barədə ABŞ-nin Müharibə Araşdırmaları İnstitutu məlumat yayıb.  Analitiklərin fikrincə,  məqsəd Ukrayna ordusunun gələcək əməliyyatları üçün taktikaları yenidən nəzərdən keçirməkdir:

“Ukrayna hələ də mövcud qüvvələrinin əksəriyyətini əks-hücum əməliyyatlarına cəlb etməyib. Ehtimal edilən fasilə əks-hücumun başa çatması demək deyil”.

Bununla bağlı Sfera.az-a açıqlama verən siyasi şərhçi Kənan Novruzov deyib ki, ABŞ İnstitunun iddia etdiyi kimi əks-hücum əməliyyatlarının müvəqqəti dayandırılması mümkündür:

“Genişmiqyaslı müharibələrdə bu cür əməliyyat fasilələri mümkündür. Əks-hücum əməliyyatlarına fasilə verilərsə, yəqin ki, bir aradan sonra Ukrayna müdafiə qüvvələri daha ciddi addımlar atacaqlar. ABŞ-nin F-16 qırıcı təyyarələrini Ukraynaya təhvil verməsi gözlənilir. İstisna deyil ki, Ukraynanın əks-hücum əməliyyatlarının ikinci, daha ciddi mərhələsi məhz F-16-ların istifadəsi ilə müşahidə olunacaq. Bundan başqa, Ukrayna müdafiə nazirinin mwavini Vladimir Qavrilov  daha əvvəl demişdi ki, qələbə üçün uzaqmənzilli silahlara ehtiyac var. Mümkündür ki, əməliyyat fasiləsi müddətində Ukrayna həmin texnikaların tədarükünə çalışacaq”.

Müsahibimiz bildirib ki, ehtimal olunan əməliyyat fasiləsi əks-hücumların tamamilə dayandırılması və ya müdafiə qabiliyyətinin zəifləməsi kimi başa düşülməməlidir:

“Sadəcə olaraq, əks-hücum əməliyyatlarının intensivliyi aşağı düşə bilər. Çünki Ukrayna azad etdiyi ərazilərin yenidən işğal altına düşməsinə imkan verməməlidir. Düşünürəm ki, hazırda davam əməliyyatlar bir növ yoxlanış xarakterlidir. Daha genişmiqyaslı əks-hücum əməliyyatları isə hələ qarşıdadır. Bu, müharibənin miqyasının genişlənməsinə səbəb ola bilər”.

Günay Rəsulqızı