\"Texniki nasazlıqla bağlı beynəlxalq şirkətlə birgə araşdırma aparılır\"- “AzInTelecom”
“Bu ilin iyunun 16-da günorta saatlarında “AzInTelecom” MMC-nin bəzi avadanlıqlarında yaranan texniki nasazlıqla bağlı ətraflı araşdırma aparılır”.
Sfera.az xəbər verir ki, bununla bağlı açıqlamanı “AzInTelecom” MMC yayıb.
Xatırladaq ki, iyunun 16-da “e-gov.az” və “my.gov.az” portallarının fəaliyyətində problem yaranmışdı.
Şirkətdən bildiriblər ki, dayanmanın qeydə alındığı andan etibarən şirkət mütəxəssisləri tərəfindən müdaxilə edilib və bir saat ərzində çətinlik aradan qaldırılıb:
“Növbəti saatlarda “AzInTelecom” MMC-dən xidmət əldə edən tərəfdaşlarla əlaqə saxlanılaraq onların sistemlərində qeydə alınan çətinliklər aradan qaldırılıb və həmin gün bir neçə saat ərzində bütün qurumların xidmətlərinin əlçatanlığı təmin edilib.
Dayanma baş verən anda dərhal beynəlxalq təchizatçı şirkətə müraciət olunub. Təchizatçı şirkətin texniki dəstək komandası və beynəlxalq mühəndislər tərəfindən araşdırmalar davam etdirilir. Baş verən hadisə çox az rastlanan hal olduğu üçün beynəlxalq şirkət tərəfindən aparılan araşdırmanın yekunlaşdırılmasına vaxt tələb olunur”.
“AzInTelecom” bildirir ki, beynəlxalq təchizatçı şirkət tərəfindən baş verən nasazlığın səbəbləri barədə şirkətə hesabat təqdim edildikdən sonra ictimaiyyətə məlumat veriləcək.
Vasif