"Rusiya Prezidenti Vladimir Putin Ukrayna probleminin həlli yollarını müzakirə etmək üçün bütün təmaslara qapını açıq saxlayır və vəziyyətin həllinə yönəlmiş bütün ideyaları dəstəkləyir".

Sfera.az TASS-a istinadən xəbər verir ki, bunu Kremlin sözçüsü Dmitri Peskov bildirib.

"Bizim üçün "Ukrayna problemi" ifadəsi tamamilə aydındır. Bu problem bir il əvvəl birdən-birə yaranmayıb, o, uzun onilliklərdir yetişməkdədir. Bu, ölkəmizin təhlükəsizliyinə aiddir.Problem sərhədimizdə etnik ruslara və Rusiya dövlətinə açıq düşmənçilik edən, hər cəhətdən xaricdən yetişdirilmiş bir mərkəzin mövcudluğuna aiddir, NATO-nun sərhədlərinin hərbi infrastrukturu ilə birlikdə bizim ərazimizə qədər genişlənməsinə aiddir”, -  Peskov Ukrayna böhranının arxasında duran amilləri sadalayıb.

“Əlbəttə, bu problemin həllinin müxtəlif yolları ola bilər və buna görə də problemin həllinə və bu münaqişənin sona çatmasına yönəlmiş bütün potensial ideyalar Putin tərəfindən dəstəklənir”, - Kremlin sözçüsü qeyd edib.

Peskov vurğulayıb ki, Putinin Afrika liderləri ilə görüşünün nəticələrinə əsasən hər hansı sənədi qəbul etmək planı yoxdur.

Daha əvvəl Kremlin köməkçisi Yuri Uşakov bildirmişdi ki, Rusiya lideri iyunun 17-də Sankt-Peterburqda bir sıra Afrika ölkələrinin yüksək rütbəli nümayəndələri ilə Ukrayna münaqişəsinin nizamlanmasına nail olmaq üçün onların birgə təşəbbüsünü müzakirə edəcək.

Əzizə Zeynal