Ermənistan Silahlı Qüvvələri dünən növbəti dəfə mövqelərimizi atəşə tutub. Son günlər hər gün oxşar provokasiyalar törədilir.

Bununla bağlı Sfera.az-a açıqlama verən siyasi şərhçi Kənan Novruzov deyib ki, bu sabotaj cəhdləri Ermənistan Baş naziri Nikol Paşinyanın Rusiyaya səfərindən sonra intensivləşib:

“Düşünürəm ki, təxribatlar sözügedən səfərlə birbaşa əlaqəlidir. Ermənistanla Azərbaycan arasında sülh perskpektivi imkanı son vaxtlar xeyli artmışdı. Sülh müqaviləsinin yaxın vaxtda imzalanacağı gözlənilirdi. Belə bir vaxtda təxribatlar niyə intensivləşdi? Bu iki səbəblə izah oluna bilər. Ya Ermənistan sülh quruculuğu prosesində qeyri-səmimidir və süni şəkildə gərginlik yaradır, ya da Cənubi Qafqazdakı sabitlikdə maraqlı olmayan və “suların durulmasını” istəməyən tərəflər var.

Fikrimcə, ikinci ehtimal daha realdır.  Məlumdur ki, hazırda sülh istiqamətində proseslər daha çox Qərb mərkəzlərində davam edir. Bu isə Rusiyanı narahat edir. Rəsmi Moskva Vaşinqton və Brüsselin fəallığını qəbul etmək istəmir. Odur ki, Kremlin süni şəkildə gərginlik yaratması tamamilə mümkündür. Xüsusilə nəzərə almaq lazımdır ki, Rusiyanın bunun üçün lazımi imkanları var”.

Ekspert deyib ki, Azərbaycanın “A” variantı diplomatik yollarla sülhə nail olmaqdır: “Amma “B” variantımız da var. Ermənistan təxribatlarını davam etdirirsə, biz “B” variantını işə salaraq yeni anti-terror əməliyyatlarına başlaya bilərik”.

Günay Rəsulqızı