Böyük Britaniyanın “Henley & Partners” konsaltinq şirkəti “New World Wealth” ilə birgə ölkələrdən dollar milyonçularının qaçışına dair hesabat hazırlayıb. 

Sfera.az xəbər verir ki, 2022-ci ili əhatə edən hesabata əsasən ən çox milyonçunun tərk etdiyi ölkələrin başında Çin və Rusiya gəlir. 

Keçən il 10,8 min milyonçu Çini, 8,5 min nəfər isə Rusiyanı tərk edib.

Hesabatı hazırlayan şəxslər bildirir ki, Rusiyanı tərk edən milyonçuların sayı proqnozlaşdırılandan az olub. “Henley & Partners” bunun səbəbini sanksiyalarla əlaqədar bank əməliyyatlarının məhdudlaşdırılması ilə izah edib.

Rusiya və Çindən sonra Hindistanı (7,5 min), Honkonqu (2,4 min), Braziliyanı (1,8 min), Böyük Britaniyanı (1,6 min), Meksikanı (800), Cənubi Koreyanı (400), Cənubi Afrika Respublikasını (400) da çoxlu sayda zəngin insan tərk edib. 

Ekspertlərin hesablamalarına görə, 2022-ci ildə ən varlı insanlar Birləşmiş Ərəb Əmirliklərinə (5,2 min), Avstraliyaya (3,8 min), Sinqapura (2,9 min), İsveçrəyə (2,2 min) və ABŞ-yə (1,5 min) gəliblər. 

“Henley & Partners” hesab edir ki, 2023-cü ildə Rusiyanı 3000 milyonçu tərk edəcək və ölkə bu göstəricidə Çin, Hindistan və Böyük Britaniyadan sonra dördüncü yeri tutacaq. Analitiklərin fikrincə, 13,5 min varlı vətəndaş Çini tərk edəcək, onlar bunu ölkədə rifah artımının yavaşlaması ilə əlaqələndirirlər. 

Vasif