Rusiyada Yeni Moskva ərazisində Xantı-Mansiysk Muxtar Dairəsi Dumasının “Vahid Rusiya” partiyasından olan deputatı Aleksandr Kolodiçi qətlə yetirilib. Onun meyiti yaşadığı evin zirzəmisində tapılıb.

Sfera.az xəbər verir ki, 58 yaşlı Kolodiç yeddinci çağırış Uqra Dumasının deputatı, büdcə komitəsinin rəhbəri olub. Onun meyiti Yeni Moskvanın Sosenskoye kəndində tapılıb.

İstintaq Komitəsi 58 yaşlı deputatın qətli ilə bağlı cinayət işi açıb.

"İlkin istintaqla müəyyən edilib ki, evdə mərhumla köməkçi arasında münaqişə baş verib, bu zaman sonuncu kişini bıçaqlayıb. Mərhumun həyat yoldaşı zirzəmidəki qışqırıq səslərinə gəlib və müttəhim onu ​​da bıçaqlayıb. Cinayətdən sonra şübhəli şəxs mərhumun cəsədini zirzəmidə basdıraraq hadisə yerindən qaçıb”- deyə məlumatda bildirilir.

Deputatın həyat yoldaşı sağ qalıb və paytaxtın tibb müəssisələrindən birinə yerləşdirilib.

36 yaşlı şübhəli saxlanılsa da, adı açıqlanmayıb.

Öldürülən Aleksandr Kolodiç kimdir?

Aleksandr Kolodiç Putinin “Vahid Rusiya” partiyasından yeddinci çağırış Xantı-Mansiysk Muxtar Dairəsi Dumasının deputatı olub və 7-ci çağırış XMAO Dumasının büdcə, maliyyə və vergi siyasəti komitəsinə rəhbərlik edib.

Deputat ölümündən bir müddət əvvəl rus əsgərlərin cəsədinin Ukrayna ərazisindən daşınmasına köməklik edib.

Qeyd edək ki, “Vahid Rusiya”nın bir çox deputatları kimi o da Ukraynaya qarşı müharibəni dəstəkləyib.

Aynil
Sfera.az