Azərbaycana ən çox pul köçürmələri hansı ölkələrdən olub? – SİYAHI
Bu ilin birinci rübündə Azərbaycana xaricdən fiziki şəxslər tərəfindən 451,54 milyon dollar məbləğində pul göndərilib.
Sfera.az xəbər verir ki, göndərilən pulun məbləği ötən ilin birinci rübü ilə müqayisədə 211,5 milyon dollar, yəni 88,1 faiz artıb.
Bu il ölkəmizə göndərilən pulun əsas hissəsi Rusiyanın payına düşüb və artımda da şimal qonşumuzun payı olduqca böyükdür.
Rusiyadan Azərbaycana 312,6 milyon dollar göndərilib. Bu məbləğ 212,9 milyon dollar və ya 2,13 dəfə artıb. Şimal qonşumuzdan ötən ilin birinci rübündə 99,7 milyon dollar göndərilmişdi.
Rusiyadan köçürülən pulun məbləğinin kəskin artması Ukrayna-Rusiya müharibəsindən sonra baş verib və artım prosesi hələ də davam edir. Müxtəlif səbəblərdən Rusiyada yaşayan insanlar yüzmilyonlarla dollar məbləğində vəsaiti Azərbaycana köçürür.
Rusiyadan sonra ən çox vəsait Türkiyədən (32,6 milyon dollar) və ABŞ-dən (15,8 milyon dollar) göndərilib.
Ölkəmizə köçürmələr artsa da Azərbaycandan xaricə göndərilən pul azalıb.
İlk 3 ayda xaricə 132,4 milyon dollar göndərilib ki, bu da əvvəlki ilin birinci rübü ilə müqayisədə 19,1 milyon dollar azdır.
Ölkəmizdən ən çox pul Türkiyəyə (34 milyon dollar), Rusiyaya (20 milyon dollar), Gürcüstan və ABŞ-yə (hər birinə 12,7 milyon dollar) köçürülüb.
Vasif