Qazaxıstan bankları tədricən rublla ödənişləri qəbul etməkdən imtina edirlər. 

Sfera.az xəbər verir ki, Qazaxıstan bankları rublla ödənişlərdən imtina edilməsinin səbəbini rəsmi qaydada cavablandırmayıblar. Ekspertlər isə belə halların artmasının səbəbini maliyyə təşkilatlarının ABŞ-nin ikinci dərəcəli sanksiyalarına düşmək qorxusu ilə əlaqələndirirlər. 

Rusiyalı mütəxəsislərin şərhlərinə görə, ABŞ dolayı təsir yolları ilə rublun bütün dünyada dövriyyəsi və dollara çevrilməsi imkanlarını məhdudlaşdırmaq istəyir. Buna görə də Rusiya şirkətləri rublla ödənişləri həyata keçirmək üçün tədricən Qırğızıstan və ya Özbəkistanın bank-maliyyə xidmətlərindən istifadə etməyə başlayıblar. 
Rusiyanın İxracatçılar və İdxalçılar Assosiasiyasının vitse-prezidenti Artur Lir vurğulayıb ki, Qazaxıstan rubldan rəsmi formada imtina etməz. Onun qənaətincə, bu baş verərsə, Astana və Moskva arasında münasibətlər pisləşəcək. O əmindir ki, söhbət xüsusi hallardan, konkret hüquqi şəxslərdən gedir. 

Bununla belə ekspertlər ABŞ-nin Qazaxıstanın maliyyə-bank sisteminə təsirlərinin tədricən artacağını istisna etmirlər. Çünki Qazaxıstan bankları ABŞ ilə konfliktə getmək imkanına sahib deyillər. Bu onunla izah edilir ki, ABŞ Qazaxıstan iqtisadiyyatının əsas sərmayədarıdır, 2022-ci ildə onların sərmayələrinin həcmi Rusiya sərmayəsindən 3 dəfə çox olub. İkinci mühüm səbəb Qazaxıstan banklarının dollarla borclarının olmasıdır. 

Vasif