Azərbaycan Qarabağda antiterror əməliyyatına başlaya bilər - DEPUTAT
İyunun 7-si saat 22:45-də Ermənistan silahlı qüvvələrinin bölmələri Qarakilsə rayonunun Brun yaşayış məntəqəsi istiqamətində yerləşən mövqelərindən Ordumuzun Laçın rayonunun Əhmədli yaşayış məntəqəsi istiqamətində yerləşən mövqelərini atıcı silahlardan atəşə tutub.
Bu barədə Azərbaycan Müdafiə Nazirliyi məlumat yayıb.
Azərbaycan və Ermənistan arasında yekun sülh danışıqlarının baş tutacağı ərəfədə vəziyyətin gərginləşməsi nə vəd edir?
Mövzu ilə bağlı Sfera.az-a açıqlama verən deputat Arzu Nağıyev ermənilərin son zamanlar aktivləşməsində Rusiya sülməramlılarının, xarici havadarların rolunun olduğunu deyib:
“İlk olaraq qeyd etmək istərdim ki, bu proseslər Ermənistandakı daxili siyasətdən qaynaqlanır. Daxildə olan pozucu qüvvələr Azərbaycanın vəziyyəti stabilləşdirmək üçün irəli sürdüyü 5 təklifin müzakirələrini dayandırmaq üçün ciddi cəhdlər edir. Bunun da əsas səbəbi Qarabağda qondarma qurumun ordusunun saxlanılmasıdır. Digər məsələ, sülhməramlı qüvvələrin öz üzərlərinə düşən missiyanı tam yerinə yetirməməsidir. Onlar yaxşı başa düşür ki, sülh müqaviləsi imzalanan kimi ərazidən çıxarılacaqlar. Təbii olaraq bu səbəblə onlar mandatlarının müddətini uzatmağa cəhd göstərirlər. Bununla da 10 noyabr, Brüssel, Soçi danışıqlarının, ikitərəfli dialoqun əleyhinə işləyən addımlar atılır”.
Millət vəkili Azərbaycanın antiterror əməliyyatlarına başlaya biləcəyini, bunun isə beynəlxalq səviyyədə qarşıdurma yaradacağını sözlərinə əlavə edib.
Əzizə Zeynal