“Türkiyədə lirənin kəskin dəyər itirməsinə panik reaksiya yoxdur, çünki seçkidən sonra bazarın gözləntiləri bu yöndə idi”.

Sfera.az bildirir ki, bunu iqtisadçı ekspert Rövşən Ağayev deyib.

 O qeyd edib ki, yerli müstəqil iqtisadi araşdırma mərkəzləri 28-30 lirayədək bahalaşmanı real sayır:

“Valyuta-kapital axınları üzərində sərt nəzarətin tədricən yumşaldılması, Mərkəzi Bankın arxa qapısından bazara müdaxiləsinin sonlandırılması siqnalının verildiyi şəraitdə zorla tutulan və real bazar dəyərinin altında qalan milli valyutanın ucuzlaşması qaçılmaz idi. İndi əsas sual budur ki, "yeni ekonomik çöküş" modelindən imtina əsas problemi həll edəcəkmi? Əsas problem ölkənin valyuta ehtiyacının qarşılanmasıdır. Ölkə idxalını və borclarını qarşılamaq üçün öz imkanları hesabına qazana bilmədiyi valyuta kəsirini kənardan gələn pullar hesabına bağlamalıdır. Cari hesabın defisitinin tarixi səviyyələrə çatması ölkənin valyuta qıtlığının real miqyasını göstərir”.

Ekspert bildirib ki, Türkiyəyə kənardan gələn pul və ya sərmayə borc şəklində ölkənin valyuta bazarında tələb-təklif tarazlığı yaradacaq səviyyədə olmalı, davamlı xarakter daşımalıdır:

“Aparılan siyasətin, yeni-köhnə hökumətin vəd və davranışlarının xarici sərmayədarlara, borc verənlərə nə qədər güvən verəcəyini yaxın aylarda görmək mümkün olacaq. Türkiyə Azərbaycanın ən böyük xarici ticarət tərəfdaşı, xaricdə ən böyük sərmayə yatırımımız olan ölkədir. Bu baxımdan ölkənin iqtisadi durumu bizim üçün həyati əhəmiyyət daşıyır”.

Türkan