Kremlin sözçüsü Dmitri Peskov bu gün səhər saatlarında partladılan Ukraynanın "Kaxovka" Su Elektrik Stansiyasından danışıb.

Sfera.az bildirir ki, o, bu barədə jurnalistlərin suallarını cavablandırıb. Peskov Ukraynanın sözügedən su elektrik stansiyasında təxribat törətdiyini söyləyib.

"Prezident Vladimir Putin Müdafiə Nazirliyindən və digər xidmətlərdən Kaxovka SES ətrafında baş verənlərlə bağlı hesabatlar alır. Artıq birmənalı şəkildə deyə bilərik ki, bu, Ukrayna tərəfinin düşünülmüş təxribatıdır”, deyə Peskov əlavə edib.

O qeyd edib ki, bu təxribat potensial olaraq regionun on minlərlə sakini üçün çox ciddi nəticələrə, ekoloji fəsadlara və hələ müəyyən edilməmiş fərqli xarakterli nəticələrə gətirib çıxara bilər:

“Moskva Kaxovskaya su elektrik stansiyasına raket hücumunda əlinin olması ilə bağlı ittihamları qəti şəkildə rədd edir. Təxribat Kiyev hakimiyyətinin göstərişi ilə edilib - onlar baş verənlərə görə məsuliyyət daşımalıdırlar”.

Əhalinin təxliyyəsinin tələb olunub-olunmayacağı ilə bağlı suala o, belə cavab verib: "Bilmirəm. İndi yerli hakimiyyət orqanlarından mesaj gözləməliyik".

Günay Rəsulqızı