“Növbəti görüşdə sülh müqaviləsinin mətni hazırlanacaq” - Politoloq

“ABŞ-nin vasitəçiliyi ilə Azərbaycan və Ermənistan xarici işlər nazirlərinin növbəti görüşündə sülh müqaviləsinin mətni hazırlanacaq”.

Sfera.az bildirir ki, bunu politoloq Məhəmməd Əsədullazadə iddia edib. O, qeyd edib ki, sülh müqaviləsi mətninin hazırlanması məhz Ermənistanın irəli sürdüyü təkliflərə görə mümkün olmayıb:

“Danışıqlar prosesində Ermənistan Baş naziri Nikol Paşinyan Qarabağ erməniləri ilə bağlı hüquq və təhlükəsizlik şərtlərini sülh müqaviləsinin mətninə salmağa çalışır. Hazırlanacaq sülh müqaviləsinin mətnində Ermənistanın bu təklifləri yer almayacaq. Həmçinin, prosesi ləngidən Paşinyanın anklavlarla bağlı mövqeyi və sərhədlərin  delimitasiyasında ordunun "güzgü prinsipi" ilə geri çəkilməsidir. ABŞ Ermənistanın mövqeyində dəyişikliklər edərək, əsassız iddialarından geri çəkilməsinə nail olacaq. İlin axırına kimi sülh müqaviləsinin bağlanması mümkündür”.

Ekspert bildirib ki,  artıq Ermənistanın Təhlükəsizlik Şurasının katibi Armen Qriqoryan da Qarabağın statusunun müzakirə edilməyəcəyini və ilin axırına qədər sülh müqaviləsinin bağlanmasının mümkün olduğunu vurğulayıb.

Türkan