“Moskva Vaşinqtondan təklif gözləyir” – Peskovdan MÜHÜM AÇIQLAMA
“Vaşinqtonla silahlara nəzarət üzrə dialoqa açığıq”.
Sfera.az bildirir ki, bunu Rusiya Federasiyası Prezidentinin mətbuat katibi Dmitri Peskov deyib.
O, ABŞ-nin milli təhlükəsizlik müşaviri Ceyk Sallivanın Vaşinqtonun Rusiya ilə ilkin şərt olmadan silahlara nəzarət üzrə dialoqa hazır olması barədə bəyanatını “vacib və müsbət” adlandırıb.
Peskov qeyd edib ki, Moskva diplomatik kanallar vasitəsilə Vaşinqtondan konkret təkliflər gözləyir:
“Bundan sonra təklif olunan dialoq formatlarını nəzərdən keçirmək mümkün olacaq. Rusiya Federasiyası dialoqa açıq olaraq qalır, biz bunu son dərəcə vacib hesab edirik, lakin ilk növbədə bu təklifin necə formalaşdığını başa düşməliyik”.
Kremlin sözçüsü vurğulayıb ki, belə mühüm və həssas məsələlərdə mətbuatda gedən bəyanatlara etibar etmək çox çətindir.
Xatırladaq ki, iyunun 1-dən ABŞ Rusiya Federasiyasına Yeni START Müqaviləsinə daxil olan strateji silahlarının statusu və yeri barədə məlumatların ötürülməsini dayandırıb. Həmçinin, yeni vizaların verilməsinin nəzərdə tutulmamasına baxmayaraq, START çərçivəsində yoxlamalar üçün rusiyalı mütəxəssislərə əvvəllər verilmiş vizaların ləğvi gözlənilir. "Biz Rusiya və Çinlə ilkin şərt olmadan silahlara nəzarət üzrə ikitərəfli danışıqlarda iştirak etməyə hazır olduğumuzu bəyan etdik", - ABŞ-nin milli təhlükəsizlik müşaviri Ceyk Sallivan deyib. Onun sözlərinə görə, Vaşinqton Strateji Hücum Silahlarının Sonradan Azaldılması və Məhdudlaşdırılması üzrə Tədbirlər Müqaviləsi (START) üzrə kəmiyyət məhdudiyyətlərinə əməl etməyə hazırdır: “Rusiya da hazır olarsa, biz əsas məhdudiyyətlərə sadiq qalmağa hazırıq".
Günay Rəsulqızı
