"Türkiyə heç bir ilkin şərt irəli sürməyib" - Ermənistan rəsmisi
Türkiyə münasibətlərin normallaşması prosesində Ermənistan-Türkiyə münaqişəsinin nizamlanması üçün heç bir ilkin şərt irəli sürməyib.
Sfera.az erməni mediasına istinadən xəbər verir ki, bunu Ermənistanın xarici işlər naziri Ararat Mirzoyan parlamentdə 2022-ci il dövlət büdcəsinin icrası haqqında hesabatın müzakirəsi zamanı deyib.
“Hər iki tərəf dəfələrlə bəyan edib ki, heç bir ilkin şərt yoxdur və məqsəd münasibətlərin yekun tənzimlənməsidir”, - Mirzoyan bildirib.
Onun sözlərinə görə, bununla bağlı bir sıra yüksək vəzifəli şəxslər tərəfindən dəfələrlə fikir və mülahizələr səsləndirilib. Bununla belə, XİN rəhbəri bir daha qeyd edib ki, erməni soyqırımının tanınması və pislənməsi məsələsi də gündəmdə deyil və indiyə qədər də olmayıb.
Mirzoyan Ermənistanın Baş naziri Nikol Paşinyanın Türkiyə prezidenti Rəcəb Tayyib Ərdoğanın andiçmə mərasimi üçün Ankaraya səfəri və Ermənistanın baş nazirinin ikinci sırada əyləşməsinə də münasibət bildirib. "Bu, protokol məsələsidir, bütün baş nazirlər ikinci cərgədə oturmuşdu. Onların arasında Ərdoğan üçün önəmli şəxs olan Macarıstanın Baş naziri Viktor Orban da var idi", - Mirzoyan deyib.
Əzizə Zeynal
