Kanadada meşə yanğınları tüğyan edir: Minlərlə insan təxliyə olunub - VİDEO
Kanadanın bir hissəsini meşə yanğınları bürüyüb.
Sfera.az bildirir ki, ölkənin Yeni Şotlandiya əyalətində genişmiqyaslı meşə yanğınları bir çox evlərin dağılması ilə nəticələnən ciddi zərərə gətirib çıxarıb. Bazar günü başlayan yanğının sahəsi genişlənməkdə davam edir və hazırda 788 hektar ərazini əhatə edir. Yerli əhali arasında itkin düşən, ölən və xəsarət alan olmasa da, təhlükəsizlik məqsədilə 16 400 nəfər təxliyə edilib.
Təxliyələrə əyalətin paytaxtı Halifaxdan təxminən 25 kilometr məsafədə yerləşən Hammonds Plains, Yuxarı Tantallon və Pokvok şəhərətrafı daxildir.
Yanğınların söndürülməsinə 200-dən çox yanğınsöndürən cəlb olunub. Hadisə yerində 30 Halifax yanğınsöndürən maşını, həmçinin iki helikopter və bir su tökən təyyarə var.
"Bu yanğının qarşısı alınmayıb, ona nəzarət edilməyib. Bu gün yanğın nəzərəçarpacaq dərəcədə yayılmayıb və bu, hava şəraiti, yanğınsöndürənlərin və aviasiya bölmələrinin işi ilə bağlıdır"- deyə Halifax Regional Yanğın və Təcili Xidmətindən bildirilib.
Yanğının baş vermə səbəbi araşdırılır. Ərazidə yanğına səbəb ola biləcək ildırım düşmədiyi üçün bunun insanlarla əlaqəli olduğu ehtimal edilir.
Xatırladaq ki, mayın 20-də Qərbi Kanada - Alberta və Britaniya Kolumbiyası regionları artıq dağıdıcı meşə yanğınlarından əziyyət çəkib. Yanğınlar kütləvi evakuasiyaya səbəb olub və Albertada xeyli sayda insan artan təhlükə səbəbindən evlərini tərk etmək məcburiyyətində qalıb. Bu vəziyyət yerli əhali arasında qorxu və panika səviyyəsinin artmasına səbəb olub.
Aysel
Sfera.az