“Britaniya qoşunları Putinə sübut edəcək ki..” – Estoniyalı nazirdən AÇIQLAMA
“Britaniya qoşunları birlikdə fəaliyyət göstərə bilmək üçün Estoniyanın ordusu, hava hücumundan müdafiəsi və ağır silahlarının necə işlədiyini öyrənir”.
Sfera.az “The Telegraph”a istinadən bildirir ki, bunu Estoniyanın baş naziri Kaja Kallas deyib. O, fikirlərini bu cür davam etdirib:
“Ordudan eşitdiklərimə görə, vəziyyət hər gün daha da yaxşılaşır. Mənim üçün ölkəmizi ilk dəqiqələrdən müdafiə etməyi bacarmağımız vacibdir. Ona görə də NATO-nun planları praktikada işləməlidir. Görürəm ki, bu mümkündür. Əgər rəqibimiz də bunu bilirsə, deməli, bu, onların hücum etmək iradəsini zəiflədir. Çünki onlar burada qalib gələ bilməyəcəklərinin fərqindədirlər”.
Baş nazir nəşrə açıqlamasında keçənilki Münhen Təhlükəsizlik Konfransında şam yeməyi zamanı Rusiyanın Ukraynaya müdaxiləsi ilə bağlı qorxularından da danışıb:
“Vacib bir müttəfiqin kəşfiyyat xidmətinin rəhbəri bu fikirləri rədd etdi. O, “Rusiya Ukraynaya hücum etməyəcək”, deyə söylədi. Mən isə qarşılığında “ümid edirəm ki, haqlısınız, çünki biz bunu başqa cür görürük və hazırlaşırıq”, deyə bildirdim”.
Nəşr xatırladıb ki, Estoniya 1940-cı ildə Sovet İttifaqı tərəfindən ilhaq edilib və yalnız 1991-ci ildə azad olunub. “Məhz bu işğala görə Kaja Kallas Britaniya qoşunları və NATO-nun digər müttəfiqlərinin Estoniyanın ərazisində məşq etməli olduğunu düşünür. Kallas fikirlərini bu cür ifadə edib:
“Tarix bizə nəyin doğru, nəyin yanlış olduğunu çox aydın şəkildə öyrətdi. Deyirlər ki, azadlığı ancaq səndən alınanda anlaya bilərsən. Mən azad olmayan nəsildənəm, lakin indi bu, belə deyil. Başa düşürəm ki, azadlıq uğrunda mübarizə aparmaq lazımdır”.
Kallas həmçinin, bu müddət ərzində Estoniya torpağında törədilən vəhşiliklərdən, elitaların öldürülməsindən, dil və mədəniyyətin sıxışdırılmasından tutmuş mülki şəxslərin kütləvi surətdə deportasiyasına qədər, hələ ki, məlum olmayan proseslərdən danışıb:
“Buna görə də Ukraynada nə baş verdiyi və bunu dayandırmaq üçün nə etməli olduğumuz bizə aydındır. Rusiya və ordusunun çoxlu itki verdiyi, gücü olmadığı barədə fikirlər diqqəti yayındırır. Onların fasiləsi, sülh müqaviləsi ancaq Kremlin maraqlarına xidmət edir. Rusiya böyük bir ölkədir, biz uzun müddətdir bu işin içindəyik və müdafiəmiz üçün hər şeyi etməliyik”.
Türkan