Çox insan Azərbaycanda əhali tərəfindən istehlak edilən əsas ərzaq məhsulunun çörək və çörək məhsulları olduğunu düşünür. Əslində isə bir ərzaq məhsulu var ki, əhali onu digərlərindən daha çox istehlak edir. 

Sfera.az rəsmi məlumatlara istinadən xəbər verir ki, Azərbaycan əhalisinin ən çox istehlak etdiyi ərzaq məhsulu süd və süd məhsullarıdır. Digər ərzaq məhsullarından heç biri süd və süd məhsulları qədər çox yeyilmir.  

Ölkəmizdə il ərzində adambaşına 252 kq süd və süd məhsulu istehlak olunur. Daha çox istehlak kənd yerlərindədir. Kəndlərdə istehlak miqdarı 254 kq-dır. Şəhərlərdə isə 250 kq təşkil edir. 

Ən çox istehlak edilən ikinci ərzaq məhsulu çörəkdir. İl ərzində adambaşına 134 kq çörək yeyirik. Çörək istehlakı kənd yerlərində 137 kq, şəhər yerlərində 131 kq istehlak olunur. 

Maraqlı fakt ondan ibarətdir ki, kənd yerlərində çörək istehlakı bir ildə 2 kq artdığı halda, şəhərlərdə təxminən 3 kq azalıb.

 
Azərbaycan əhalisinin daha çox istehlak etdiyi ərzaq malları arasında tərəvəz və bostan bitkiləri 3-cü sırada dayanır. Bir ildə adambaşına 111,7 kq tərəvəz və bostan bitkiləri istehlak edilib. 

Şəhər əhalisi kənd əhalisi ilə müqayisədə daha çox tərəvəz və bostan məhsulu istifadə edir. Kənddə adambaşına 110,9 kq istehlak olduğu halda, şəhərdə 112,4 kq-dır. 

Meyvə istehlakında da eyni vəziyyətdir. İl ərzində adambaşına 84 kq meyvə istehlak edilir ki, bunun da çox hissəsi şəhər əhalisinin payına düşür. Şəhərlərdə adambaşına 85 kq, kəndlərdə 82,4 kq meyvə yeyilir. 

Kartof istehlakı da çoxdur. İl ərzində insanlar 76,75 kq kartof yeyir. Şəhər yerlərində istehlak 78 kq, kənd yerlərində 75,5 kq təşkil edir. 
Kartof da nəzərə alınarsa, tərəvəz və bostan bitkilərinin istehlak miqdarı 188 kq-ı keçir. 

Ən vacib qida məhsullarından olan ət və ət məhsullarının istehlak miqdarı 35 kq, qənd və qənnadı məmulatlarının istehlakı 30,8 kq, bitki yağı və marqarin 11 kq, balıq və balıq məhsulları 7,5 kq-dır. Toyuq yumurtasının istehlak miqdarı isə 162 ədəddir. 

Vasif