Ermənistanın keçmiş prezidenti Serj Sarkisyan baş nazir Nikol Paşinyanın dünənki mətbuat konfransında səsləndirdiyi fikirlərə münasibət bildirib.

Sfera.az bildirir ki, o, bu barədə bəyanatla çıxış edib.

“Davamlı olaraq, o cümlədən son beş ildə Qarabağın Azərbaycanın bir hissəsi olmayacağını bəyan etmişəm. Mən və başçılıq etdiyim siyasi qüvvə - Respublika Partiyası bütün bəyanatlarımızda, çıxışlarımızda və mesajlarımızda bu məsələyə prinsipial yanaşmalarımızı daim vurğulamış və səsləndirmiş, bizim üçün həyati əhəmiyyət kəsb edən mövzu, eyni zamanda Ermənistan hökumətinin dağıdıcı addımları ilə bağlı mövqelərimizi bənd-bənd ortaya qoymuşuq.  Qarabağ problemini, eləcə də Ermənistan dövlətinin qurulması vəzifəsini həyatımın missiyası hesab edirdim və indi də belədir”, - deyə Sarkisyan qeyd edib.

Qarabağ separatçılarının sabiq liderləri Bako Saakyan, Arkadi Qukasyan da birgə bəyanatla çıxış ediblər. Onlar qeyd ediblər ki, Paşinyanın səsləndirdiyi fikirlər Ermənistan dövlətçiliyinin əsaslarını sarsıdır:

“Bu, onun bütün dünya ermənilərinin maraqlarını qorumaq üzrə öhdəliklərinin pozulmasıdır. Biz Ermənistan baş nazirinin təqdim etdiyi yanaşmaları qəbul etmirik və etməyəcəyik”.

Qeyd edək ki, dünən Paşinyan Qarabağın Ermənistan tərəfindən Azərbaycan ərazisi kimi tanınması barədə fikirlər səsləndirib.

Günay Rəsulqızı