ABŞ-nin 18 ştatında 81 nəfərdə görülən nadir bakteriya ölkəni təşvişə salıb.

Sfera.az bildirir ki, “Pseudomonas aeruginosa” adlı bakteriya səbəbindən ölənlərin sayı 4 nəfərə yüksəlib. Sözügedən virus Kaliforniya, Kolorado, Konnektikut, Delaver, Florida, İllinoys, Şimali Karolina, Nyu-Cersi, Nyu Meksiko, Nevada, Nyu-York, Ohayo, Pensilvaniya, Cənubi Dakota, Texas, Yuta, Vaşinqton və Viskonsin ştatlarında aşkarlanıb. Amerikalı mütəxəssislər qeyd edib ki, bu bakteriya göz bəbəklərində “əriyə bilən” nadir növdür və standart antibiotik terapiyasına müqavimət göstərir. Xəstəlik ilk dəfə bu ilin əvvəlində ortaya çıxıb və nəticədə bir nəfər infeksiyadan ölüb. 4 nəfər isə ağır infeksiyaya görə göz bəbəyindən imtina etməli olub.

Sürətlə yayılan bakteriyalar üzərində araşdırmaya başlayan səlahiyyətlilər infeksiya ilə reseptsiz satılan göz damcıları arasında əlaqənin təsbit edildiyini açıqlayıb. Hindistanda bir fabrikdə istehsal edilən “EzriCare” və ya “Delsam Pharma” adlı damcılarla bağlı xəbərdarlıq edilib. Qida və Dərman Administrasiyasının daha sonra apardığı araşdırmada sözügedən şirkətin istehsal proseslərinin steril olmadığı və təhlükəsizlik protokollarının yerinə yetirilmədiyi üzə çıxıb. Xəstələrin istifadə etdiyi göz damcıları bir-bir yoxlanılıb, şüşələrdə antibiotiklərə davamlı bakteriyalar müşahidə edilib. ABŞ Xəstəliklərə Nəzarət və Qarşısının Alınması Mərkəzləri Hindistanda istehsal olunan və ABŞ-yə idxal edilən iki markanın xəstəlikdən sonra satışının dayandırıldığını açıqlayıb.

Qeyd olunub ki, bakteriyaya yoluxmuş xəstələrdə sarı-yaşıl axıntı, bulanıq görmə, qızartı və işığa həssaslıq kimi əlamətlər olub. Göz damcılarından istifadə etdikdən sonra görmə qabiliyyətini itirən xəstələrin isə məhkəməyə müraciət etməyə hazırlaşdıqları öyrənilib. Məlumata görə, ABŞ-də təxminən 17 milyon insan göz damcılarından istifadə edir.

Günay Rəsulqızı