Ermənistanın Baş naziri Nikol Paşinyanın Azərbaycanın ərazi bütövlüyünü tanımasını etiraf etməsindən sonra Ermənistanda siyasi ekspertlər bu yöndə müxtəlif açıqlamalar verməyə başlayıblar. Bəzi analitiklər bu bəyanatın Paşinyanın sonunu gətirəcəyini iddia edirlər.

Mövzu ilə bağlı Sfera.az-a açıqlama verən politoloq Zərdüşt Əlizadə Paşinyanın son bəyanatının erməni xalqı üçün ciddi mənada önəm kəsb etmədiyini deyib. Ekspert ermənilər üçün narahatlıq doğuran məsələlərin fərqli olduğunu qeyd edib:

“Paşinyan bu bəyanatı gerçək qüvvələr nisbətini hesablayaraq verib. 44 günlük müharibənin sona yetməsindən 2 ildən çox müddət keçib. Bu müddətdə erməni cəmiyyəti əsassız iddialar, ümidlər, bəyanatlar mərhələsindən keçərək addım-addım gerçəyi dərk etməyə yaxınlaşır. Gerçək isə bundan ibarətdir ki, Ermənistanın beynəlxalq hüququ təftiş etməyə, qonşu dövlətə hərbi yolla qalib gəlməyə nə gücü çatır, nə də müttəfiqi var. Paşinyan da bu prosesləri izləyir və bilir ki, artıq məqam çatıb – reallığı dərk etmək lazımdır. Paşinyanın ərazi bütövlüyümüzü tanımasını etiraf etməsindən 2 gün keçib. Ermənistanda üsyan, mitinq başlayıbmı? Hər kəs öz işindədir, bu qərar əhalini çox narahat etmir. Ümumiyyətlə, Qarabağ məsələsi erməni əhalisinin maraq dairəsində 3-4-cü yerdə durur. Ermənilər üçün indi birinci yerdə güzəran, təhlükəsizlik məsələləridir”.

Politoloq yaxın zamanlarda sülh müqaviləsinin imzalanacağına diqqət çəkib:

“Düşünürəm ki, mayın 25-də Paşinyan Vladimir Putin və İlham Əliyevlə görüşündə bu mövqeyi müdafiə etsə, Avropa rəhbərlərinin qarşısında bu fikirləri təkrar etsə, o zaman sülh müqaviləsi də imzalanar. Bununla isə münaqişə sona çatmış hesab olunacaq. Ondan sonra isə əsas məsələ Azərbaycan hakimiyyətinin Qarabağ erməniləri ilə aparacağı danışıqlardır. Erməni əhalisi Azərbaycan ərazisində təhlükəsiz yaşayacağına inandırılsa, proseslər müsbətə doğru gedəcək. Bundan sonra isə Türkiyə-Ermənistan sərhədləri açılacaq və ümid edirəm ki, hər iki xalq arasında olan müharibə, yaşanan faciələr tarixin səhifələrində qalacaq”.

Əzizə Zeynal