ABŞ Dövlət Departamentinin mətbuat katibinin müavini Vedant Patel Vaşinqtonda Azərbaycan və Ermənistan xarici işlər nazirlərinin danışığını vacib addım kimi qiymətləndirib. Onun sözlərinə görə, görüş zamanı tərəflər bir neçə vacib sualları müzakirə etmək, bir-birinin nəzər nöqtəsini görmək imkanı qazanıblar. Patel problemin sülh yolu ilə həllinə inamını ifadə edib. 

Sözügedən çıxışla bağlı Sfera.az-a açıqlama verən siyasi şərhçi Kənan Novruzov deyib ki, Vaşinqton Moskvaya nisbətən sülh müqaviləsində daha maraqlıdır:

“Rusiyadan fərqli olaraq ABŞ-ni düşündürən daha çox iqtisadi məsələlərdir. Ağ Evin Cənubi Qafqazdakı iqtisadi maraqlarının reallaşması üçün regionda təhlükəsizliyin təmin olunması, həmçinin nəqliyyat-kommunikasiya xətlərinin açılması vacibdir. Bu mənada ABŞ-nin danışıqlar istiqamətindəki təşəbbüskarlığı başa düşüləndir. Rusiya isə bütün imkanları ilə ehtimal edilən sülh müqaviləsinə mane olmaq istəyir. Amma Vaşinqton israrlı görünür. V. Patelin söylədikləri məhz bu israrın təzahürü kimi qiymətləndirilməlidir”.

Müsahibimiz bildirib ki, gələcəkdə Ağ Evlə Kreml arasında gərginlik daha da arta bilər və rəsmi Bakı bu böhranı fürsətə çevirməli, öz maraqları naminə istifadə etməlidir:

“Vaşinqtonun İrəvana da təzyiqini artırması və Moskva təhlükəsi ilə onu hədələməsi mümkündür. Yəni ABŞ Ermənistana deyə bilər ki, mənim söylədiklərimi etməyəcəksənsə, mən də səni Rusiyaya qarşı tək qoyacam.  Bu mənada Ermənistanın işi getdikcə çətinləşir. Rəsmi İrəvan 2, hətta 3 stulda oturmağa dava etdikcə baş nazir Nikol Paşinyanın həm hakimiyyəti, həm də həyatı təhlükə altında olacaq. Hökumət başçsısı bunları unutmamalı və reallıqları nəzərə almalıdır”. 

Günay Rəsulqızı