Zelenski bu açıqlaması ilə Putini çaşdırmaq istəyib? - “The New York Times”
“Zelenskinin əks-hücum əməliyyatı ilə bağlı son çıxışı Qərbə hesablanıb”.
Sfera.az bildirir ki, bu barədə “The New York Times” nəşri məlumat yayıb. Qeyd olunub ki, Ukrayna lideri Qərbi genişmiqyaslı hücumun mümkün uğursuzluğuna hazırlamağa çalışır.
Nəşrin yazdığına görə, rəsmi Kiyev qərbli tərəfdaşlarının planlaşdırılan hücum əməliyyatından gözləntilərini azaltmaq istəyir. Bundan əlavə, müəlliflər Ukrayna rəhbərinin ABŞ və digər ölkələrə yeni texnika və sursat əldə etmək üçün təzyiq göstərməyə çalışdığını istisna etməyiblər.
“Ukraynalı hərbi və siyasi analitiklərin dediyi kimi, Zelenski ordunun hücum ərəfəsində davam edən çatışmazlıqları barədə haqlı idi”, – nəşr vurğulayıb.
Bildirilib ki, Kiyev əks-hücumun təxirə salınması barədə məlumat yaymaqla Moskvanı çaşdırmaq və Ukrayna komandanlığının əsl planlarını gizlətmək niyyətindədir.
Xatırladaq ki, ötən gün Zelenski əks-hücum əməliyyatı ilə bağlı danışarkən “Biz irəli gedə və uğur qazana bilərik, amma çox insan itirərdik. Bu, qəbuledilməzdir. Ona görə də gözləmək lazımdır. Hələ bir qədər də vaxta ehtiyacımız var”, deyə söyləmişdi.
Günay Rəsulqızı