“Saakaşvilini ölüm ayağında tərk edənlər...” – Zahid Orucdan AÇIQLAMA
"Üç ildir, uzanan sülh müqaviləsi bu il də imzalanmasa, sərhədlər açılmasa, Paşinyan Sarkisyanlaşacaq, Koçaryanlaşacaq".
Sfera.az xəbər verir ki, bunu Milli Məclisin bu gün keçirilən plenar iclasında deputat Zahid Oruc deyib. Millət vəkili bəzi qüvvələrin Azərbaycanı haqsız yerə günahlandırdıqlarını bildirib:
"Xankəndi erməniləri ilə birgə yaşayışdan danışan kimi, bizi hüquq və azadlıqları pozmaqda suçlayırlar. Misirə, Liviyaya, Yaxın Şərqə inqilab ixrac edənlər yüz minlərlə insanı demokratiyaya görə qətlə yetirdilər. İndi Gürcüstan həbsxanasında can çəkişən Mixail Saakaşvilini ölüm ayağında tərk edənlər onu diktaturaya qarşı simvol adlandıranlar, Paşinyandan ikinci Saakaşvili düzəldirlər. Silahlı və ya məxməri çevrilişlərlə hakimiyyətə gələnləri demokratiya zirvələrinə çağıranlar, dünyanı siyasi qütblərə ayıranlar, bir də onda ayıldılar ki, Rusiya da onlar kimi Ukraynada özünə təhlükə törətməyən hakimiyyət qurur”.
Deputat ölkəmizdə seçkilər, insan haqları və demokratik azadlıqlar sahəsində görüləsi işlərin olduğunu vurğulayaraq sözünə belə davam edib:
“2020-ci ildə isə ordumuz Şuşanı fəth edərkən xarici indekslərin heç bir əhəmiyyəti qalmadı. Bizə işğal və qeyri-sabitlik doğuran demokratiya əvəzinə, azadlıq və torpaq bütövlüyü gətirən təhlükəsizlik gərəklidir".
Əzizə Zeynal
