Qışa nisbətən yaz-yay mövsümündə mütəmadi olaraq zəhərlənmə ilə bağlı hadisələrin şahidi oluruq. Dərman və gübrələrdən istifadə etməklə tez yetişdirilərək bazara çıxarılan xiyar, pomidor, çiyələk və s. kimi meyvə və tərəvəz məhsullarından zəhərlənmə ehtimalı böyük olur. 

Bununla bağlı Sfera.az-a açıqlama verən qida məsələləri üzrə mütəxəssis Ağa Salamov deyib ki, meyvələr mövsümündə yeyilməlidir:

“Meyvə yaxşı yuyulmalıdır, ancaq sirkədə yumaq qəti qadağandır. Çünki indiki meyvələrə yabanı otlar, böcəklərdən qorumaq və.s üçün xüsusi nəzərdə tutulmuş pestisidlər vurulur və bunlar turşu olduğu üçün sirkə turşusu ilə reaksiyaya girir. Nəticədə kimyəvi zəhərlənmə qaçılmaz olur. Meyvə və tərəvəzlərin düzgün yuyulması üçün isə çay sodasından istifadə etmək lazımdır. Belə ki, heç bir turşu ilə reaksiyaya girməyən çay sodasından bir xörək qaşığı 10 litr suya əlavə edirik,  meyvələri bu suda 10 dəqiqə saxladıqdan sonra axar su altında durulayıb yeyirik”.

Müsahibimiz qeyd edib ki, xarab olan meyvənin zəhərləmə riski də qaçılmazdır:

“Yaxşı olar ki, meyvələri yumadan soyuducuda, öz cinsinə uyğun rəfdə mühafizə edək və yeyərkən yuyaq. Əgər meyvə və tərəvəzlər həddindən artıq çirklidirsə, yuduqdan sonra yaxşı qurulanıb soyuducuda mühafizə olunmalıdır”.

Günay Rəsulqızı