Şirkətlərin banklarda olan vəsaitləri azalır - Daha çox bu vəsaitlər çıxarılır

Azərbaycanda artıq üçüncü aydır ki, depozitlərin həcmində azalma müşahidə edilir. 

Sfera.az xəbər verir ki, 2022-ci ilin dekabrında 36,25 milyard manat dəyərində olan depozitlərin həcmi sonrakı 3 ayda, yəni birinci rüb ərzində davamlı azalaraq 34,55 milyard manata düşüb. 

Birinci rüb ərzində depozitlərin həcmi 1,7 milyard manat, yəni 4,7 faiz azalıb. 

Depozitlərin azalmasının səbəbi qeyri-maliyyə təşkilatlarının vəsaitlərinin bir hissəsini banklarından götürməsidir. 

Qeyd edək ki, depozitlər 3 hissədən - əhalinin əmanətlərindən, maliyyə və qeyri-maliyyə təşkilatlarının vəsaitlərindən ibarətdir. 

Birinci rübdə əhalinin əmanətləri və maliyyə təşkilatlarının vəsaitləri artıb. Bu müddətdə əmanətlərin məbləği 11,743 milyard manatdan 11,964 milyard manata, maliyyə təşkilatlarının vəsaitləri isə 2,48 milyard manatdan 2,64 milyard manata yüksəlib. 

İki mənbə üzrə vəsaitlər artsa da qeyri-maliyyə təşkilatlarının vəsaitləri kəskin azalıb. Birinci rüb ərzində qeyri-maliyyə təşkilatları banklardan 2,075 milyard manat çıxarıb və bunun nəticəsində şirkətlərə aid olan vəsait 22,025 milyard manatdan 19,95 milyard manata enib. 

Qeyri-maliyyə təşkilatlarının vəsaitlərində azalma daha çox xarici valyutada olan vəsaitlərdə baş verib. Xarici valyutada olan vəsaitlər 1,63 milyard manat azalıb. 

Vasif