Çox sevdiyimiz bu yemək depressiyaya SALIR - ARAŞDIRMA + FOTO
Yeni bir araşdırma bəzi qızardılmış qidalar, xüsusilə də kartof qızartmasının depressiyaya səbəb olduğunu ortaya çıxarıb.
Sfera.az bildirir ki, mütəxəssislər isə araşdırmanı şübhə ilə qarşılayıblar.
Klinik psixoloq, Kalqari Universitetinin köməkçi professoru Conatan Sti “On ildən artıqdır ki, ağır depressiyadan əziyyət çəkən insanlara kömək etmək üçün xəstəxana şəraitində işləmişəm. Lakin heç vaxt qızardılmış kartofun insanları xəstəxanalıq etdiyini görməmişəm”, deyə sosial media hesabında qeyd edib. O, sözügedən araşdırmanı təəssüf hissi ilə qarşıladığını deyib. Pediatr və tibbi kitabların müəllifi professor Col Şulkin isə “Depressiyaya düşən insanlar əksinə, kartof qızartması yeməyə daha çox meylli ola bilərlər”, - deyə söyləyib.
“Proceedings of the National Academy of Sciences” elmi jurnalında dərc olunan araşdırmaya görə, 11 il ərzində qızardılmış qida qəbul edən 140 mindən çox insanda narahatlıq pozğunluğu və depressiya olduğu aşkar edilib. Çinin Hançjou şəhərindən olan tədqiqatçılar tərəfindən aparılan araşdırma yarım milyon britaniyalı iştirakçının genetik, sağlamlıq və həyat tərzi məlumatlarını əhatə edib. “Burada qızardılmış qida, xüsusən də qızardılmış kartof istehlakının daha yüksək narahatlıq və depressiya simptomları riski ilə güclü şəkildə əlaqəli olduğunu aşkar etdik. Kişilər xüsusilə həssas qrupdur. Kartof qızartması yemək narahatlıq pozğunluğu riskini 12 faiz, depressiya riskini isə 7 faiz artırır. Bu, qızartma prosesində meydana gələn akrilamid adlı kimyəvi maddə ilə bağlı ola bilər”, - araşdırmaçılar qeyd edib.
ABŞ Qida və Dərman Administrasiyası isə bildirib ki, akrilamidin insanlar üçün hansı riskə səbəb olduğu tam aydın deyil.
Türkan
