2022-ci ildə dövlət 1 794 ailəni evlə təmin edib, 991 ailəyə isə güzəştli şərtlərlə mənzil almağa şərait yaradıb.  

Sfera.az rəsmi məlumatlara istinadən xəbər verir ki, evlə təmin edilən ailələrin 691-i Azərbaycanın ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi olan şəxslərdir. Daha 480 mənzil ərazi bütövlüyünün, müstəqilliyinin və konstitusiya quruluşunun müdafiəsi zamanı şəhid olmuş şəxslərin ailələrə verilib. 

Bunlardan başqa məcburi köçkünlərə 238 mənzil, əlilliyi olan şəxslərə, o cümlədən sağlamlıq imkanları məhdud uşaqların ailələrə 199 mənzil, Çernobıl AES-də qəzanın ləğvində iştirak etmiş və həmin qəza nəticəsində zərər çəkmiş vətəndaşlara 83 mənzil, həqiqi hərbi xidmətdən ehtiyata və ya istefaya buraxılan hərbi qulluqçulara 12 mənzil verilib. 

Adıçəkilən sosial qruplardan başqa digər ailələr 91 mənzillə təmin olunub. 

Verilən mənzillərin 724 ədədi Bakıda, o cümlədən 423-ü Sabunçuda, 155-i Binəqədidə, 95-i Suraxanı rayonunda yerləşir. Abşeron rayonunda 489 mənzil, Samux rayonunda 83 mənzil, Gəncə şəhərində 68 mənzil, Zəngilan rayonunda 66 mənzil, Beyləqan rayonunda 48 mənzil, Ağcəbədi rayonunda 30 mənzil ailələrə verilib.
Rəsmi məlumatlara əsasən, mənzil alan ailələrin üzvlərinin sayı 6 889 nəfərdir. Verilən mənzillərin ümumi sahəsi 121 313 kvadrat metrdir. Bir mənzilin orta sahəsi isə 67,6 kvadrat metrdir.

Ən böyük mənzillər Zəngilan rayonunda əhaliyə verilən mənzillərdir. Buradakı mənzillərin orta sahəsi 157 kvadrat metrdən çox olub. 

2022-ci ildə ölkəmizdə daha 991 ailə güzəştli şərtlərlə mənzil alıb. Bu ailələrin 815-i Bakının Yasamal rayonunda yerləşib. Bundan başqa daha 176 mənzil Gəncədə güzəştli şərtlərlə ailələrə satılıb. 

Vasif