2023-cü ilin aprelin 1-nə olan məlumata əsasən ev təsərrüfatlarının banklara olan kredit borcu 11,378 milyard manata çatıb.

Sfera.az Mərkəzi Banka istinadən xəbər verir ki, yanvar-mart ayları ərzində əhalinin banklara olan kredit borcunda artım 488 milyon manat və ya 4,48 faiz olub. 

Məlumatlardan aydın olur ki, əhali bu ilin birinci rübündə hər ay borclarını orta hesabla 162,6 milyon manat artırıb. 

Əhalinin cəmi kredit borcunun 10,933 milyardı manatla alınan vəsaitlərdir. Xarici valyutada isə 444,6 milyon manat dəyərində borc götürülüb. 

Banklardan alınan borcların böyük hissəsi – 10,121 milyard manatı uzunmüddətli, yəni 1 ildən artıq müddətə götürülüb. 

Əhalinin borclanması ilə bağlı diqqəti cəlb edən əsas dəyişiklik biznes kreditlərinin həcminin artmasıdır. Son məlumata görə, əhalinin biznes kreditləri üzrə borcu 2,288 milyard manata çatmaqla cəmi borcun 20,1 faizini təşkil edib. 

2019-cu illə müqayisədə əhalinin cəmi kredit borcu 1,69 dəfə artdığı halda, biznes kreditləri üzrə borcu 3,62 dəfə artıb. 

Vasif